Assit takukkit: Inuit 200-t Ida Heinrichimut silatangiaasut
Operartartup Ida Heinrichip najugaata silataani silatangiaanissamut nammineq aaqqissuussaq, Nuummi soqutiginnittunit tigulluarneqarpoq.
Inuit 200-t missaanniittut Ida Heinrichip Qinngutsini najugaata silataanut arfininngornermi ualikkut aggerput, operartartoq juullisiutinik silatangiaaffigiartorlugu. Taanna Esther Brandt Arensimit ikinngutaanillu, meeraanermiilli Ida Heinrichimik ilisarisimannittumit aaqqissuunneqarpoq.
Taanna Facebookimi pilersaarutini oqaluttuaralugu pisussamik nalunaaruteqarpoq, Nuummi innuttaasunit soqutigineqarluartoq paasinarsivoq.
Illuatungilerlugu tunniusserusuttut
- Ida (Heinrich, aaqq.) meeraallutali ilisarisimasarigakku. Nalunnginnakku Ida inoqatiminut tunniusserusuttuusoq, soorlu erinarsornerup tungaatigut. Tassuuna inuppassuit sunnertarmagit illuatungilerusullugu taamatut aaqqissuussivugut, Esther Brandt Arens, Sermitsiaq.AG-mut taama oqaluttuarpoq.
- Nalunnginnatigulu Ida nukeerukkiartortoq. Ilaqutariit pikkusuffiata nalaani nukissaannik aamma tunerusukkatsigit, taanna oqarpoq, kræftimillu napparsimanera eqqaallugu.
Ida Heinrichip apriilimi 2016-imi inalukkamigut kræfteqarnini paasivaa.
Inunnik katersuutsitsineq ajornanngitsoq
Aaqqissuussaq killitsinnartorujussuusoq aamma inuit taama amerlatigisut peqataanerat tuppallernarlunilu tupaallannartoq, Esther Brandt Arens oqaluttuarpoq.
- Ataatsimoortitsineq sunaaffa taama ajornanngitsigisinnaasoq. Annertuumik iliuuseqanngikkaluarluni ataatsimoorneq pilersinneqarsinnaasoq takuarput, aaqqissuisoq oqaluttuarpoq.