assammik arsarneq
Assit takukkit: GOG ajorsaqqippoq
Unamminerit pingasut ingerlatiinnarlugit GOG ajorsarpoq
Kolding KIF Københavnimi sapaatip akunnera kingullermi unamminermi ajorsarput. Bjerringbro-Silkerborgimut ataasinngormat ajorsarput, Skjern Håndboldimullu aamma ippassaq pingasunngornermi GOG ajorsarlutik.
Unammineq aallartimmat GOG aallartilluaraluaqaat. Inuit 1400-t isiginnaarput. Saassussinerit imaaginnavipput, Minik Dahl Høeghilu isertitseqattaarluni. Minik Dahl Høegh qasulernissami tungaanut aatsaat taama arsarluartigaaq. Unamminermi minutsit aqqaneq-marluk ingerlaneranni GOG-kkut unammilluaqaat, tassami 12-7-mik siuaqqagamik. Akutaaneq Kreutzmann unammiffimmut iserami isertitsivoq 13-8-mut, tupaallannartumillu unamminerup inerneqarnissaa pissangassutigineqaleraluarluni, kingullermimi Skjernimut unamminermi GOG tupaallaataasumik ajugaammata.
Unammisut muminneranni GOG 15-13-imik siuaqqavoq, naak unammisut ilaat anisitaagallaraluartut.
Mumereernerulli kingorna unammineq allanngorpoq. Skjernip arsartui EM-imut peqataasut Kasper Søndergaard Henrik Møllgaard, kiisalu nunanut allanut unammisartuusimasoq Claus Møller Jacobsenip arsarluarnerisa kingorna paasinarsivoq sooq Skjern Håndbold angutit unammisarneranni siuttuunersut. GOG-ikkut illersuisui angummassinnaajunnaarput, unamminerlu 23-29-mik inerneqarluni Skjern ajugaalluni.
Anisitaagallarnerit
GOG-ikkut sungiusaasuat Jakob Larsenip unammineq assigiinngitsunik misigisaqarfigaa.
- Pikkorinnerusunut unammivugut. Nunanut allanut unammisartui pikkorittorujussuupput, arsartugulli anisitaagallarneri akisunaarparput. Minutsini arfineq-pingasuni unamminermi ikinnerunitsinni arfinilinnik isertitsiffigineqarpugut. Unammisagullu arsartunik anisitaasoqaraangata assinganik iliorsinnaaneq ajorluta, taamaattumillu ajorsarpugut. Team Tvis Holstebromut sapaatip akunnerata tulliani unamminissatsinnut sungiusangaatsiartariaqarpugut, Jakob Larsen oqarpoq.
Minik Dahl Høegh sisamariarluni isertitsivoq, Akutaaneq Kreutzmann ataaseraartoq.
Kalaallit isiginnaaqataasut
GOG-p unammisarfiani GOG Arenami pisarnertut kalaallinik isiginnaartoqarpoq. Glamsbjerg Fri- og Efterskolemi atuartut arfineq-marluk isiginnaaqataapput, GOG-lu ilinniartitsisutik ilagalugit illersorlugit.