ileqqutoqaq
Assit takukkit DR-p juullimut inuulluaqqussutaa piareerpoq
Nunarsuarmi isiginnaarutikkut aallakaatitassiani pisoqaanerpaaq Aalborgimi immiunneqarpoq
Musikkens hus-imi (nipilersortartut illuat aaqq.) Aalborgimiittumi KNR-TV-p DR-llu decembarip 18-ni aallakaatitassaat immiunneqarpoq. Aallakaatitassiat 85-sissaat taamaasilluni piareerneqarluni.
Pilersaarutit malillugit unnuk ingerlanneqarpoq. Pulaartullu 1200-t issaareermata aallakaatitsinermi ingerlatsisoq Timm Vladimir immiussineq aallartillugu tikilluaqqusivoq. Amerlasuut utaqqisut allattorsimaffianiissimapput inuulluaqqusinermi peqataarusullutik.
- Danmarkip illoqarfiini Aalborg kalaaleqarnerpaavoq. Grønkandshavni kisimi pissutaanani illoqarfiunnguaq najoruminarmat kalaallit ikinngeqaat, Timm Vladimir nassuiaavoq aqutsisoqatinilu Maria Motzfeldt nunarsuarmi qeqertat annersaanni juullip inua ujassallugu ikioqatigiillutik.
Erinarsoqatigii Ikinngutigiit immiussineq tamaat Julie Berthelsen peqatigalugu erinarsoqattaarput. Small Time Giantsikkullu aputaasani ukioq manna nakkartitseqqaarlutik.
Uummannami meeqqat angerlarsimaffianeersut peqataapput.
Atuaruk: Nunatsinnut juullimi inuulluaqqusinermut inissat tamakkerneqartut
Aallakaatitami angalaartoqalaavippoq. Aalborgimit Ilulissanut, juullip inuata Uummannami najugaanut Aalborgimullu uteqqilluni. Ilaquttanut inuulluaqqusinerit tupaallatsitsinerillu unnuup ingerlanerani misigineqarput.
Immiussineq naammassimmat isiginnaariat qalunermut uutanik sassaallerfigineqarput juullillu ulloriaanik angerlaassassaminnik tunitillutik.