Uppinnaveersaarneq
Assit takukkit: Yoga-mi VM-imi nunarput peqataatitaqarpoq
Arfininngormat Londonimi Logan Hall-imi Yoga-rluni nunarsuarmi pissartanngorniunnerit aallartinneqarput. Nunatsinneersoq Tupaarnaq Binzer normu 46-runngorpoq
– Peqataasunit 57-init normu 46-runngorpunga, Tupaarnaq Binzer nuannaartoq oiqiliallassimasorlu oqarpoq, taannalu Nunarput sinnerlugu Yoga-mi nunarsuarmi pissartanngorniunnermi peqataavoq, tassani nunat assigiinngitsut 32-t Londonimi Logan Hall-imi pissartanngorniunnermi peqataatitaqarlutik.
Siullermeersumik Kalaallit Nunaat peqataatitaqarpoq. Tupaarnaq Binzerilu kusanartumik qernertumik-qaqortumik qalipaatilimmik yoga-dragteqarpoq nunatta erfalasuanik puisillu amianik pinnersaatilimmik, ilusilersuisartumit Bibi Chemnitz-imit saneqarsimasumik.
Natsinneersup yoga-mi inissisimaffiit piumasarineqartut arfineq-marluk tamaasa kukkunani ingerlappai, tamannalu pivoq piffissap sivikitsup, minutsit pingasut, iluani.
Tupaarnaq Binzerip takutitsinini naammassimmagu isiginnaartut ersaattaappaat. Taamaakkaluartoq peqataasut allat assigalugit takutitsinini naammaginngilaarpaa, takutitsineq kusanaraluartoq.
– Aappaagu pitsaanerusumik takutitsissaanga, annilaangalaarsimavunga, maannali oqiliallattorujussuuvunga, Tupaarna Binzer Sermitsiaq.AG-mut oqarpoq.
Danmarkimit peataasoq Andrea C. Lund nrmu 45-runngorpoq. Andrea C. Lund Nunatsinni inunngorsimavoq.
– Tunumi inunngorpunga inuuninnilu ukiut siulliit Kalaallit Nunaanni najugaqarlunga, Andrea C. Lund oqarpoq, taassumalu Bikram-yoga 203-imi decembarimi ingerlatilersimavaa, yoga-lli allat ukiuni arlalinni ingerlassimallugit.
Arnat angutillu peqataasut 107-k yoga-mi inissisimanernik takutitsinissaminnut tamarmik minutsinik pingasunik piffissaqarput. Yoga-mi nunarsuarmi pissartanngorniunnerit 11-issaraat. Ukioq manna pissartanngorniunnermi London aaqqissuussisuuvoq.
Angusarinnerpaat qulit sapaammi finalissapput.