Assit takukkit: Uusarqak Qujaukitsumut nersornaat sølvi

Inatsisartut Siulittaasoqarfiata Uusarqak Qujaukitsoq, Qaanaaq, sølviusumik Nersornaaserpaat, Inatsisartut ilisimatitsipput.

Uusarqak Qujaukitsoq ‘inuiaqatigiinni kikkunnut tamanut atugassarititaasut pitsanngorsarniarlugit ilungersorluni suliniuteqarsimanera nersorniarlugu’ sølvimik Nersornaaserneqarpoq.

Uummannaq
- Siusinnerusukkut oqarsimavutit 1980-ikkut aallartilaarneranni puisit amii pillugit paasisitsiniaanermut peqataanerit inuuninni suliarisimasavit pingaarnersarigaat, kisiannili aamma minnerunngitsumik kingusinnerusukkut maluginiarneqarsimavutit Uummannamit nuutsitaanerup 1968-imilu Pituffiup eqqaani timmisartorsuup qaartartorsuutip B-52-ip nakkarnerata kingunerinut taarsiiffigitinnissamik sorsuuteqarnermi, Inatsisartut Siulittaasoqarfiata isumaa malillugu pingaaruteqartutut oqaatigineqartariaqartunik, Inatsisartut tulliata siulliup, Agathe Fontainip oqalugiarnermini ilaatigut oqaatigaa.

Taassuma aamma oqaatigaa, Uusarqak Qujaukitsup qinikkatut sulinera 1971-imili kommunalbestyrelsimut ilaasortanngorami aallartittoq, 1984-imilu siullermik Inatsisartunut qinigaasoq.

Atuaruk: Filmit piviusulersaarutit killitsinnartut

ICC-imi sulinera
- Taamatuttaaq Inuit Issittormiut Siunnersuisoqatigiiffianni, ICC-mi, ilaatigut nunatsinnit aallartitat siulittaasuata tulliatut, suliniarsimanerit puigorneqartariaqanngilaq, nunat inoqqaavisa pisinnaatitaaffii sorsuutigalugit. Pituffimmi radareqarnikkut amerikarmiut annertusaanialermata ICC-mi suleqataavutit kingunerisinnaasai uparuartorlugit, innuttaasut illersorniarlugit.

- Suliassat taakkartorneqartut imaannaanngikkaluartut illit, Uusarqak, ataasiaannarnak tunuarsimaarnak peqataasarsimavutit innuttaasut pisinnaatitaaffiisa sorsuutigineqarnerini, minnerunngitsumillu innuttaasut qulaatiinnarlugit aalajangiisoqarsinnaanngimmat, taamaaliortoqarpallu tamatuma kinguneqartinneqartariaqarneranik.

Assit allaaserisap ataani takukkit