Utoqqaat naapeqatigiittut
Assit takukkit: Utoqqaat pikkorissartut
Ulluni kingullerni utoqqaat Sulisartut Højskolianni ilaatigut peqatigiiffimmi sulinermik pikkorissartinneqarput
Kujataani utoqqaat sinniisui Qilaliarfimmiilli Qaqortumi Sulisartut Højskolianni ataatsimiillutillu pikkorissartinneqarput. Naapisimaaqatigiinneq ullumi sapaammi naassaaq, Qaqortup Timersortarfiani utoqqaat ulluannik nalliussinermik.
Steffen Silassenip, Kalaallit Nunaanni Timersoqatigiit Kattuffiannersup, pikkorissarneq aaqqissuussimavaa pikkorissartitsinermilu pisortaasimalluni.
Pikkorissarnermi peqatigiiffimmi siulersuisuni sulinerinnaq peqatigiiffiullu aningaasaqarnera kisimik sammineqanngillat, aammattaarli sammineqarput utoqqaat timersornerat aammalu utoqqaat amerlanerusut peqatigiiffinnut isertinniarlugit tusagassiorfinnik sulineq.
Kujataani utoqqaat sinniisui 14-it pikkorissarnermi peqataapput. Paamiunit pingasut, Qaqortumit sisamat, Narsamit pingasut Nanortalimmillu pingassut. Kiisalu Aasianneersoq Magnus "Magnu" Therkildsen peqataavoq, taannalu Kalaallit Nunaanni utoqqaat sinniisuanni siulittaasuuvoq.
Utoqqaat kattuffiat
Magnus Therkildsenip pikkorissarnermi oqaatigaa Kalaallit Nunaanni utoqqaat peqatigiiffii 15-iusut. Illoqarfiilli arlallit, soorlu Nanortalik, Avannaanilu illoqarfiit marluk, utoqqarnut peqatigiiffeqanngillat. Taanna isumaqarpoq utoqqaat peqatigiiffii 15-iummata nuna tamakkerlugu utoqqaat kattuffiannik - imaluunniit utoqqaat peqatigiiffiisa kattuffiannik - pilersitsisoqarsinnaasoq.
Steffen Silassenip pikkorissartunut Magnus Therkildsenimullu kajumissaarutigaa utoqqaat kattuffiannik pilersitseqqullugit.
Pingaaruteqarpoq utoqqaat kattuffeqarnissaat, utoqqaat soqutigisaannik kommunalbestyrelsini Inatsisartunilu, saqqummiussisartussamik.
Peqatigiiffik timersornerlu
Pikkorissarneq sisamanngormat aallartippoq, tassani sammineqarluni peqatigiiffimmi siulersuisunut ilaasortaaneq siulersuisutullu akisussaassuseqarneq, tamatumani ilanngullugit siuittaasutut, aningaaserisutut, allatsitut aammalu ilaasortaannaat sinniisullu akisussaaffii.
Ilanngullugu sammineqarput utoqqaat amerlanerujussuit qanoq isilluni peqatigiiffinnut ilaasortanngortinneqarsinnaasut, tv-p, radiop, aviisit internettillu ilaalu ilanngullugit qanoq atorneqarsinnaasut.
Tamatuma saniatigut peqatigiiffinni piumassutsimik sulineq oqaluuserineqarpoq, sumi utoqqartut timersortoqarsinnaasoq, utoqqaat timersuutit suut aallussinnaaneraat.
Tallimanngornermi sammineqarput utoqqaat peqatigiiffiata aningaasaqarnera aningaasanillu aqutsineq; sponsorissarsiortarneq; aningaasanut pilersaarusiorneq; ukiup tullianut missingersuusiorneq taamatuttaarlu ukiunut tulliuttunut pingasunut pilersaarusiorneq.
Arfininngornermi sungiusariaatsit assigiinngitsut allaanerusumillu sungiusariaatsit sammineqarput, kiisalu utoqqaat peqatigiiffiisa sumiiffimmi sungiusarnissaannut siunnersuutit sungiusariaatsinillu takutitsinerit. Tamatuma saniatigut Qaqortormiut naapisimaarneqarput tamatumalu kingorna naliliisoqarluni.
Ullumi sapaammi, ullormi kingullermi, Qaqortup Timersortarfiani utoqqaat ulluat nalliussineqassaaq na. 13.00-miit na. 15.00-mut.
Tallimanngormat arlalinnik oqalugiartoqarpoq, tassa Paamiunit peqataasut ulloq taanna naggataarmata.
Ulloq erinarsuutinik kissaatigisanik Højskolip erinarsuutaaneersunik naggaserneqarpoq.
Utoqqaat aappaagu Aasianni naapeqatigiissapput.
Assit ataani takukkit.