ilinniagaqarneq
Assit takukkit: Universitetimit soraarummeertut tulluusimaarput
Tallimanngormat Nuummi universitetimi Ilisimatusarfimmi soraarummeertoqarpoq. Meeqqat illersuisuat avataanit qaaqquneqarluni oqalugiartuuvoq
Tallimanngormat Ilisimatusarfimmi ilinniagaqartorpassuit bacheloritut kandidatitullu ilinniakkaminnik naammassinnittut allagartartaartinneqarput.
Ukioq manna kandidatitut naammassinnittut pisarnermit ikinnerupput, bacheloritulli naammassinnittut pisarnermit amerlanerullutik, pisarnertullu ilinniakkaminnik naammassinnittut pilerngunneqarluarput, ilarpassuilu suliffittaareersimapput.
Soraarummeertunut oqalugiartussatut avataanit qaaqquneqarsimavoq meeqqat illersuisuat Aviâja Egede Lynge.
Oqalugiaatigai ilinniagaqarnerup pingaaruteqassusia, namminermut naatsorsuutigisat aammalu aqutsisutut takutitsisinnaanissaq.
Ersissuteqarasi
Meeqqat illersuisuata ilanngullugu eqqaavai inuusuttut meeqqat atuarfiannit anisut 63,5 procentii ilinniagaqarfinni ingerlaqqinneq ajortut, soraarummeersullu kajumissaarlugit inuusuttut neriuuteqalerseqqullugit, tamakkununnga maligassiuisooqqullugit takutillugillu ilinniagaqarneq siumut aqqutissaasoq.
Naggataatigut Aviâja Egede Lyngep erseqqissarpaa soraarummeertut inuiaqatigiinni ileqqut ersigissanngikkaat, namminermisulli saqqummertassasut, pisariaqartutullu isigisatik oqaatigisarlugit.
Tusagassiortut arfinillit
Oqalugiarneq ingerlanneqarpoq ilisimatusarfiup initaani kusanartuni, tamatumalu saniatigut allagartartaartitsisoqarnerani nipilersortunik erinarsortunillu akunniliisoqartarpoq nersornaasiisoqartarlunilu.
Soraarummeertut ilagaat Tusagassiornermi bachelorinngortut arfinillit, taakkunannga tallimat arnaallutik.
Ukiuni 20-ni Tusagassiornermik Ilinniarfik aatsaat taama amerlatigisunik soraarummeersitsivoq.
Ilinniarluarsimasut pilerngunneqarput
– Aaqqissuisoqarfinnut isereersimavusi, tusagassiortunik marluinnik oqaasilinnik atorfissaqartitsisorujussuarnik, immikkoortoqarfimmi pisortaq Nauja Paulsen tusagassiortunngorlaanut oqalugiarnermini oqarpoq.
– Tamanna tulluusimaarutigaarput. Suliffittaarnissaq ilissinnut ajornartorsiutaanngilaq. Piumasassinnilluunniit toqqaasinnaangajappusi. Sinnassaataalinngisaannarlili Tusagassiornermi bacheloritut atorfinitsitaasinnaagassi, allagartartaarli suliluunniit atsiorneqarpianngitsoq.