Fire personer i fare
Assit takukkit: Ukkusissami annaassiniarneq
Pissutsit atuuttut eqqarsaatigalugit østrigimiut takornariat sisamat ajunngillat, sisamanngormat unnukkut kingusissukkut Nuummi Qatserisartunit qaqqami annaassiniartartunit annaanneqarnermik kingorna
Ajorluinnartumik pisoqarsimasinnaagaluarpoq, qujanartumilli tamarmi ajunngitsumik inerneqarpoq, sisamanngormat unnukkut inuit sisamat Nuup eqqaani qaqqami Ukkusissami ajornartorsiortorujussuanngormata ikiortissarsiorlutillu.
Taakkua - østrigimiut takornariat sisamat, arlaat ataaseq arnaq - Nuummi Qatserisartunit annaanneqarput pissutsillu atuuttut eqqarsaatigalugit ajoratik.
Politiit nalunaaqutaaq 19.19 ikiortissarsiortunit sianerfigineqarput.
– Ukkusissanut qaqinerminnut atatillugu aternerminni naliliinerlussimapput Ukkusissallu kitaatungaani 300 meterit missaannik qullasissusilimmiillutik. Pujortorujussuuvoq naliliippullu imminnut ulorianartorsiortinnatik ingerlaqqissinnaanatik, Nuummi politiini vicepolitikommissær Gerth Kristiansen nassuiaavoq.
Pujoqisoq innaaqisorlu
– Nalunaaruteqartoqarnera pissutigalugu Nuummi Qatserisartut suleqatigalugit annaassiniartoqarpoq. Annaassiniarneq ajornakusoortinneqarpoq pujornerujussuanik, inuillu sisamat taakkua qaqqap sinaani sivingaqisumiinnerannik.
Gerth Kristiansenip oqaatigaa qatserisartut ajornartorsiortut nalunaaqutaq 21.30 missaani attaveqarfigisimagaat, tamatumalu kingorna qaqqamit ammukaallugit.
Sermitsiaq.AG-meersoq annaassiniarnermi najuuttoq Bennt Kokholm malilugu angutit pingasut arnarlu nalunaaqutaq 23.30 Ukkusissamit suli ammukaanneqarsimanngillat pujornerujussua pissutigalugu.