Nuuk
Assit takukkit: Ukiormut arlaleriarluni tivolertitsisoqartalernissaa takorloornerqarpoq
Nuummi silarlukkaluartoq tivoliarartoqarnera iluatsittumik ingerlanneqarpoq akunnerup naanerani
Ukiuni arlaqartuni tivolertoqarsimannginnera Nuummi innuttaasunit maqaasineqarsimagunarpoq.
- Annertunngitsumik sinneqartooruteqarpugut, Godthåbhallenimi Inussivimmilu pisortaq Jens Berthelsen oqarpoq.
- Nuummi sila atoruminarpallaanngikkaluartoq, aamma karusselli ajoqquteqaraluartoq aaqqissuussinermut inuppassuit ilaapput. Meeqqanit misilinneqarsinnaasut misilinneqarput, Jens Berthelsen oqaluttuarpoq.
Ukiumut arlaleriaq
- Aaqqissuussineq iluatsilluarpoq, Inussivimmi aamma ammatinneqarpoq. Nipilersortoqarpoq Inussiviup iluani sukujunnillu aamma pisisoqarsinnaalluni, ukiumut arlaleriarluni tivolertitsisoqartalernissaanik takorluugaqartoq Jens Berthelsen oqarpoq.
- Illup iluani ukiamut tivolertitsinissarput eqqarsaatigaarput. Suli taanna takorluuginnarallarparput. Eqqarsaat suleqatigiilluta ingerlatissavarput, Jens Berthelsen oqarpoq.
- Misilinneqarsinnaasunik nutaanik aamma ujartuivugut. Maannakkut pigisagut qangarnisaapput ilaallu atorneqarsinnaajunnaareerlutik.
Nuup arsaaffiata eqqaa aggustip naanerani 1981-miit 2009-mut tivolerfigineqartarsimavoq. Tassani Skt. Georgs Gildet issakatsiaafinnik, kaavittunik, seqquusartarfinnik, candyflossinik atortunillu allanik tivolimut tunngatinneqarsinnaasunik ikkussuisarsimavoq.
Sinneqartoorutit Nunatsinni meeqqanut inuusuttunullu suliniarnernut ingerlateqqinneqartarsimapput. Aaqqissuussarli ima annertugilersimavoq nukiit amerlanerit pisariaqartinneqalersimallutik.
Asserpassuit ataani takuneqarsinnaapput