Immikkut ittumik suliaq
Assit takukkit: Triton immikkut ittumik suliaqartinneqartoq
Sakkutuut umiarsuaata Tritonip Nuka Arctica Sisimiut tungaanut ilaannakortumik sapaatip akunnera kingulleq ingiallorpaa, pajuttaat sikumut ajorsereersorlu
Sakkutuut umiarsuaat Triton sakkutuut umiarsuisa naliginnaasumik suliarisartagarinngisaannut pingasunngormat kingullermik suliakkerneqarpoq, Nuka Arctica Sisimiunut ingerlaartilluni, Kangerlussuup paavani sikumut ajorsimmat.
Umiarsuarmi alapernaarsuut Triton, piffissami matumani nunatta sineriaani alapernaarsuisoq, motoreqarpoq 120.000 hk-nik nakuussuseqartunik, taamaalillunilu sikukkut issusuukkut ingerlaarsinnaasarluni.
- Sikusiutaasinnaanerata kinguneranik umiarsuaq immikkut ittunik suliakkerneqarpoq, umiarsuarmut sorsuummut suliassamik qaqutigoortumik, Arktis Kommando Facebook-imi quppernermi allappoq.
Nuka Arctica Sisimiunut pingasunngormat kingullermik apuuppoq, ilaatigut Tritonimik ingiallorneqartarluni.
Sisimiut avannaatungaani pissutsit taamaaginnarallarput
Royal Arctic Line nittartakkamini allappoq sapaatip akunnerata naanerata ingerlanerani kitaani kujasimmik anorlernerata kingorna Nuup Sisimiullu akornanni siku kimmut ingerlaalersimasoq.
Kisianni Sisimiut avannaatungaani Qeqertarsuullu Tunuani pissutsit taamaaginnarallarput.
- Royal Arctic Linemit pissutsit qanimut malinnaaffigineqarput, ulluinnaallu tamaasa sikoqassuseq pillugu nittartakkatsinni nutaarsiassaqartitsisassaagut, taamaalillutik sullittakkat aamma suleqatigisartakkat sapinngisamik pitsaanerpaamik nutaarsiassaqartinneqarniassammata, Royal Arctic Line allappoq.
Allaaserisap ataani assit takukkit