talerminneq
Assit takukkit: Talermittartut Sverigemi unammillerneqangaatsiartut
Nunat tamalaat talerminnermik Sverigemi unamminerminni kalaallit unammeqataapput
Talerminnermik peqatigiiffiit Nanoq Pullers aamma The Inuit Warriors nuummeersut Sverigemi illoqarfimmi Eskilstunami 'Golden Arm'-imi peqataanerat Sermitsiaq.AG-mi allaaserineqartareerpoq.
Unamminerni nunarsuarmi kiisalu europami pissartaasut aamma peqataapput.
- Naatsorsuutigereerparput sakkortuumik unammisartuvut unamminissaat. Minik Sune Trondheim Johansen inuuniutigalugu talermittartunut unammivoq. Ataaseriarluni ajugaavoq. Malik Frederiksen Motzfeldt Class 1-mi aamma ataaseriarluni ajugaavoq. Gerth Poulsen unamminerni ajugaanngitsoorpoq, Nanoq Pullersimi siulittaasoq Lars Jørgen Petersen tusagassiuutinut nalunaarummi allappoq.
Tupaallatsitsineq
Malik Frederiksen Motzfeldt ajoqquseqqalaarnini pissutigalugu talimi aappaannaanik unammeqataasimasoq Lars Jørgen ilisimatitsivoq.
- Jan Heilman unamminerni takutitsilluaqaaq. Marloriarluni ajugaavoq Class 1-milu unammisani sukataartittarlugit. Taama angusarissaartiginera tupaallaatigaarput nuannaralugulu. Dommerinit unammisaminiillu nersualaarneqarpoq, Lars Jørgen Petersen oqarpoq.
Peqataaneq ilinniarfiusoq
The Inuit Warriorsineersoq Mikkel Andersen Class 1-ni inuuniutigalugulu unammisartuni aamma peqataavoq. Peqataaneq misigisaasoq annertooq oqarpoq.
- Talermittartut misilittagartuut unammivakka. Peqataanera sakkortunaalaarpara. Periaatsit timersuummi apeqqutaasorujussuusut paasivara. Uani timersuummi nukittunissaq kisimi apeqqutaanngilaq, Mikkel Andersen Sermitsiaq.AG-mut oqarpoq.
Inuuniutigalugu unammisartuni unammeqqaarami ajugaavoq. Unamminerni tulliuttuni marlunni ajorsarluni. Aamma taamatut ingerlavoq Class 1-mi unamminermini.
Assit ataani takukkit