Assit takukkit: Sungiusaammik unamminermi siullermi ajorsartut

Unamminermi qanoq inerneqarnissaa pillugu pissanganarsinngisaannartumi OB-meersut nukittuut 6-1-imik ajugaapput, muminnissamut unillatsiarnermi 3-1-imik siuaqqareerlutik. Angutit nunanut allanut unammisartut arnat nunanut allanut unammisartut peqatigalugit Svendborgip kujataani Tåsingemi sungiusaqatigiipput Tuluit Nunaatalu qeqertaani Jerseyimi Island Gameseqarnissaanut piareersarlutik.

Kalaallit nunanut allanut unammisartut minutsini 90-ini tamani tamaviaarput. Taamaattorli arsaqatigiinnerup ingerlalluarnerulernissaanut unammisartut sungiusaqatigiinnermik amigaateqartorujussuunerat takulertorneqarsinnaavoq. Nunanut allanut unammisartut OB-mut unamminnginnerminni Tåsingemi ulluni marluinnarni sungiusaqatigiissimapput. Nunatsinni ukioq manna aputeqarpallaarnera pissutigalugu silami tallimariaannarluni sungiusartoqarsimavoq. Kalaallit isertitatuaat Norsaq Lund Mathæussenimit isertinneqarpoq. Nunanut allanut unammisartut nalinginnaasumik målmandertik Looqi Svane sulinini pissutigalugu Tåsingemi sungiusaqatigiinnermut suli tikissimanngitsoq amigaatigaat.

Aallartilluni ajunngivissoq

Erseqqilluinnartumik ajorsartoqaraluartoq unamminerup kingorna kalaallit tungaannit naammagisimaarinnittoqarpoq. Nuna tamakkerlugu sungiusaasoq Tekle Ghebrelul unamminerup kinguninnguatigut Sermitsiaq.AG-mut ima oqarpoq:

- Maanna aallartivippugut, tamannalu tamatigut nuannersuusarpoq. Arsaattartut inuusuttut ilaannik arsaattoqarluta aallartippugut, tamannalu soorunami akeqarpoq. Illuatungaatigut taamatut sukkassusilimmik arsaannermik misiliinerat ajunngilluinnarpoq. Sungiusimasatsinnit sukkanerusumik ingerlasoqarpoq, aamma OB-meersut timikkut uatsinnit nukittunerunerat, kukkunittalu tassuuguinnaq pillarneqartarnerat erseqqipppoq.

Inissat ilaanni paarlaassuinitta peqatigisaanik arsaanneq patajaallisarparput ajoriinnagassaanngitsumillu naggasiilluta.

U 19 liga

OB U19 Danmarkimi U19-ini pitsaanerni unammisartuupput ukiorlu unammisaqattaarfiusoq naammasseqqammerlugu. Kalaallinut nunanut allanut unammisartunut unammineq aasaanerani sulinngiffeqarnissaq sioqqullugu unamminerit kingullersaraat.

Unammisartut taakkua sulinngiffeqallatsiareerunik ukiup unammisaqattaarfiusup nutaap aallartinnissaanut sunngiusalissapput. Sungiusarnermi tamatumani ilaatigut marloriarluni sungiusaqatigiittoqassaaq, tamarmik immikkut sapaatip-akunneranik ataatsimik sivisussusilinnik. Siullermik sapaatip-akunnerani ataatsimi Danmarkimi, tullianillu sapaati-akunnerani ataatsimi Hollandimi. U19 ligami ukiumi unammisaqattaarfiusumi naammasseqqammersumi FC Midtjylland ajugaasuuvoq. OB U19 normu 10-nngorpoq.

Angutit arnallu nunanut allanut unammisartut ullumi arfininngornermi unammissapput. Unammisartut tamarmik immikkut Tåsingemut unammissapput.

Aamma atuaruk Danmarkimi sungiusaqatigiinneq

Aamma atuaruk Isikkamik arsaannermi unammisartut Island Gamesimi kikkut unammissaneraat