Nalliussineq
Assit takukkit: Savaatillit ukiumoortumik naapeqatigiinneranni pisorpassuit
– Aamma ukioq manna hiisteqanngikkaluartoq
Arfininngormat savaatillit ukiumoortumik ataatsimeersuarput, tamannalu ukioq manna Narsami ingerlanneqarpoq. Ukiumoortumik ataatsimiinnerit kujataani illoqarfiit pingasut akornanni sinnersaraattumik ingerlanneqartarput, ukioq mannalu Narsaq aaqqissuussisuuvoq. Savaatillit ataatsimiinnerannut atatillugu nalinginnaasumik hiistilinik aliikkusersuillunilu takutitsisoqartaraluarpoq, ajoraluartumilli ukioq mannaanngitsoq.
Akerlianik sorpassuarnik pisoqarpoq unamminernik, arpannermik, noqqoruunnermik arsaannermillu.
Isorartuumut arpaliunnermi ajugaavoq savaatilik Magnus Nielsen, Tasilikulooq. Normu 2-ngorpoq Henrik Frederiksen, Qaqortumeersoq, normu 3-ngorporlu Narsameersoq Erni Mølgaard.
Noqqoruunnermi savaatillit meerartaat, nuliaat angutitaallu unammisaminnut illoqarfimmiunut ajugaapput.
Meeqqallu arsaalluni unamminermi piumassuseqarluarlutillu tamaviaaqaat, unamminerlu 2-2-mik inerneqarpoq, angutillu arsaanneranni savaatillit 5-3-mik ajugaapput.
Savaatillit peqatigiiffianni siulersuisut siulittaasorlu ukiunut marlunnut qinerneqartarmata, siornalu Niels Lund siulittaasunngornikuummat, ukioq manna siulersuisuni allanngortoqanngilaq.