Assit takukkit: Randi naalakkersuisooqatigiit droninngertaaraat

Randi Vestergaard Evaldsen (D) tikilluaqqussutitut tajanik nuersakkanik sapakkanik kusassaatilinnik tunisippoq, Vittus Qujaukitsorlu (S) naasut qilertanik tunisippoq.

Naalakksersuisooqatigiit Siumut, Demokraatit aamma Atassut ullumi nalliuttorsiorpalaartumik naasunillu tunniussinertalimmik allanngortinneqarnerat malunnartinneqarpoq - tassanilu Randi Vestergaard Evaldsen qinigaq amerlanerpaanik akisussaaffeqartoq pingaarnertut ataqatigiissutaavoq.

Uldum stressilertoq
Qujaukitsoq ullumi siullermik akisussaaffigisimasaminut uterluni inuussutissarsiornermut, suliffeqarnermut, niuernermut aamma nunanut allanut naalakkersuisunngoqqippoq, demokraatillu inuusuttup Naalakkersuisusunut ilaasortaasimasoq Andreas Uldumip akisussaaffigisimasai tamaasa akisussaaffigilerpai, aningaasaqarnermut aamma aatsitassanut naalakkersuisunngorluni.

Atuaruk: Anda Uldum politikkimit tunuarpoq

Oktobarimi 2015-imili, Uldumip napparsimalluni nalunaarutini Kim Kielsenimut (S) tunniummagu, qaammatillu pingasut qaangiuttut aningaasaqarnermut aamma partiimi siuttutut atorfini taamaatikkamigit nunatsinniillu aallarmat, Evaldseni niuernermik aamma inuussutissarsiornermik akisussaaffik tigumminikuuaa.

Oqaatigineqartariaqarporlu taanna ilikkariartupallassimasoq, tassami politikeri 108-nik taamaallaat taasisoqarnikuulluni ukiakkut 2014-imi Inatsisartunut ilaasortanngorpoq, saniatigullu Demokraatit inuusuttaanni siulittaasutut unilluni.

Suli attaveqarfigineqanngitsoq
Randi Vestergaard Evaldsenip maannakkuminngaanniit aningaasaqarnermut inatsisit aamma aatsitassanut tunngasut akerleriissutigineqartut akisussaaffigilerpai.

Sermitsiaq.AG marlunngornermi ullaap tungaani Namminersorlutik Oqartussanut politikeri apersorumallugu attaviginnippoq, sulili tassanngaanniit tusagaqanngilaq.

Atuaruk: Randi aningaasaqarnermut aatsitassanullu naalakkersuisunngorpoq

Uani ataani assit takukkit