Nuuk
Assit takukkit: Quassussuarmi ikuallanneq qaminneqarpoq
Ajoqusertoqanngilaq Nuummiulli amerlasuut unnuk manna tupatsitaapput
Ataasinngormat unnukkut Nuummiorpassuit sulinerup kingorna tupassimallutik Quassussuarmut isiginnaarput, tassani ikuallattoqarluni qernertumik pujortorsuummat.
– Nalunaaqutaq 17.30 nalunaarfigitippugut ATV-mi ikuallattoqartoq. Qatserisartut sukkasuumik takkupput innerlu qamillugu, Nuummi Politiineq pigaaertoq Sebastian Bech Sermitsiaq.AG-mut oqarpoq.
Pujortorujussuaq
Ikuallanneq akunnerup affaa qaangiuttoq, nalunaaqutaq 17.50, qaminneqarpoq, qaqqalli tunuanit, Qinngutsinnit, suli sualunnerusutut isikkoqarpoq qernertumik pujuliornerujussua pissutigalugu.
Piffissap ilaani tamaan helikopterip nipaa tusarsaavoq, politiilli oqaluttuarput qamutip assakaasullip ikuallanneranut atatillugu helikopterimik ikiuuttoqarneranik ilisimasaqaratik.
Ajoqusertoqanngilaq
Ataani assini, inussiarnersumik Lars Frederik Andersenimit Knud Peter Lyberth Mortensenimillu atukkiunneqarsimasuni, ersarippoq pujuliornera siulleq annikitsuaraannaasoq.
Ikuallannermut atatillugu inunnik ajoqusertoqanngilaq.
– Ikuallanneq misissuleruttorparput, ilimanarporli motooria kissattoorsimasoq, Sebastian Bech oqarpoq.