Assit takukkit: Qeqqata Kommuniata utoqqaat nersornaaserai

Qeqqata Kommunia ukiut tamaasa innuttaasuminut inunnut immikkut malunnaatilimmik nersortarialimmillu soqutiginninnermik, eqiasuissutsimik nammineersinnaassutsimillu takutitsisimasunut nersornaasiisarpoq.

Kommunalbestyrelsilu ukiormanna Sisimiuni aamma Maniitsumi nersornaasiiniarluni aalajangersimavoq.

Maniitsumi nersornaaserneqarput Ole Kreutzmann, Karl A. Møller aamma Lene Møller, Sisimiunilu Birgithe Johansen, Marta Olsen aamma Samuel Olsen nersornaaserneqarsimallutik.

Sisimiuni nersornaaserneqartut ilisaritinneqarneri:

Birgithe Johansen, Sisimiut:

• Birgithe Johansen 70-nik ukioqarpoq, Qeqertarsuarmilu inunngorsimalluni.
• Birgithe Johansen uinilu Kristian Johansen katereeramik Sisimiunut 1965-imi nuupput.
• 1965-imi KGH-mi sulileqqaarnerminiit ukiualuit ingerlareersut Brugsenimi sulilereerluni soraarninngorpoq.
• Birgithe Johansen peqatigiiffilerinermik soqutigisaqartuuvoq, ukunanilu aningaasarsiutiginngikkaluarlugu aningaaserisutut tatigineqaqaluni siulersuisuni inissisimavoq: Sanningasoq tungujortoq, Utoqqaat peqatigiiffiat "Utoqqaat Nipaat", Peqatigiinniat kiisalu Sisimiuni Rød Korsi.

Samuel Olsen, Sisimiut:

• Samuel Olsen 80-nik ukioqarpoq, Sisimiunilu inunngorsimalluni.
• 1948-mi KGH-p allaffiani arpattunngorpoq kingornalu ilinniartunngorluni. Ukiorpassuit KGH-mi sulivoq, tatigisaalluni suliai suleqataanut iluaqutaalluartarsimapput.
• Ukiut 30-t qatserisartutut sulivoq aammalu politiinut ikiortitut ukiut 26-it.
• Timersuummik aallutaqarsimanera maluginiakkat ilagaat, tassa sisoraatinik ingerlataqarsimammat 2005-ip missaanilu unitsissimallugu. Minnerunngitsumik ukioqqortusinikuugaluarluni nunarsuarmi sisoraatinik unammersuarneq sakkortunersaannut Arctic Circle Race -mut 100 km misilissimallugu.

Marta Olsen, Sisimiut:

• Marta Olsen 1946-mi Sisimiut eqqaanni Saqqarlerni inunngorsimavoq. Marta 1962-imi Sisimiunut nuuppoq kiffatullu sulileqqaarsimalluni.
• Ukiut ingerlanerini atuarfimmi 1995-ip tungaanut eqqiaasutut, kaffiliortutut sulisimavoq, ilinniartitsisunit meeqqanillu nuannarineqartupilussuusimalluni.
• 1995-miit 2000 tikillugu napparsimalernissami tungaanut meeqqerivimmi Naja/Aleqami sulivoq.
• Maluginiakkat ilagaat Marta Olsenip assassullaqqissuunera, kalallillu ileqquinik ingerlataqarnissaq suleqataaffigaa soorlu ilinniarfiit assigiinngitsuni ilitsersuisuusarlunilu suleqataasarsimasoq.

Maniitsumi nersornaaserneqartut ilisaritinneqarneri:

Karl Asser Møller, Maniitsoq:

• Karl Asser Møller 76-nik ukioqarpoq, Maniitsumilu 1938-mi inunngorsimalluni.
• Karl Asser Møller atuartuunermini pikkorissuuvoq arlaleriarlunilu nr. 1-iusarsimalluni. Tunuarsimaartuusimaneratalu ilinniaqqinnissaminut aporfiusarsimagaluartoq peroriartornermini peqatigiiffilerineq ingerlatarilersimavai ilaatigut soorlu timersoqatigiiffik Aqissiaq aallarneeqataasimalluni.
• Inuusuttuulluni aalisariummut naalaganngorsimavoq, kingornalu nammineq 42 fodsimik angallatitaarpoq aalisakkanillu raajarniarnerlu annerusumik sammisarilersimallugit. Umiartortunngorunnaarami pisiniarfimmik ammaavoq maanna kinguaaminut ingerlateqqissimassaminik.

Ole Kreutzmann, Maniitsoq:

• Ole Kreutzmann ukiorpassuarni fabrikkimi aalajaalluni sulisartuusimavoq, formandiusarsimallunilu. Fabrikki matummat nulianilu nunatta pissarititaanik aallussilersimapput soorlu umimmaat qiviuinik suliaqartalersimapput tusaamasaassutigilikkaminnik.
• Kommunalbestyrelsimut ilaasortaasimavoq borgmesteritullu tullersortaasarsimalluni sulilluarsimavoq.
• Sisorarneq ingerlatarisimavaa timersoqatigiiffimmillu KS-69 aallarneeqataasimalluni. Peqatigiiffilerinermini suleqatiniminut pitsaasumik sunniilluartarsimavoq ataatsimoortitsisinnaanermillu naapertuilluarneq anersaaralugu piginnaaneqarluni.
• Ullumikkut utoqqaat peqatigiiffianni suleqataalluartuuvoq iluaqutigineqarluarlunilu. Soorlu siornatigut siulittaasuunermini qinikkanut Naalakkersuisunullu suleqatigiilluarneq aallartilluarsimagaa ullumikkut sunniutaalluartumik.

Lene Møller, Maniitsoq:

• Lene Møller 65-nik ukioqarpoq Maniitsullu peqqissaaviani atorfeqarluni.
• Maniitsumi innuttaasunit maluginiarneqartut ilagaat suliaminut tunniusimalluartuunera suliassaasullu ilaatigut sinnerlugit suliniartarnera innuttaasunik ataqqineqaatigalugu.
• Maniitsup Peqqinnissaqarfiata ingerlalluarneranut siuarsimaneranullu Lene Møller sunniutaalluarpoq suleqatiminit innuttaasunillu nuannaarutigineqangaartumik. Ukiup naalernerani Peqqinnissaqarfimmi sulinini naggataarutigissavaa soraarninngussallunilu.

Assit allaaserisap ataani takukkit