Nuuk
Assit takukkit: Nuuk Nordisk Festivalip nuannersumik ammarnersiorneqarnera
Ippassaq Nuuk Nordisk Kulturfestival 2015 kulturip illorsuani Katuami ammarnersiorneqarmat inuit 100-t sinneqartut peqataapput
Nuuk Nordisk Kulturfestival, NAPA-mit aaqqissorneqartoq, pingasunngornermi oktobarip 21-anni kulturip illorsuani Katuami ammarnersiorneqarpoq, inuit 150-it peqataaffigisaannik. Borgmesterip tulliata Justus Hansenip NAPA-llu pisortaata Mats Bjerrep oqalugiarlutillu tikilluaqqusinerisa kingorna qallunaat marluusartut ´The Embla´ aliikkusersuillutik marlunnik atuipput.
Atugaat siulleq ´My heart is beating´ marluusartut Ilulissani feriartillutik sanasimavaat.
Qallunaat marluusartut siusinnerusukkut assersuutigalugu Afrikami angakkut rytmiinik suliaqarsimapput. Unnukkut tusarnaartitsinermi marluusartut tusarnaartitseqatigaat Hans-Henrik Suersaq Poulsen, ilaatigullu Varna, Peqatigiiffik Inngertartuneersoq.
Rosa nuannisaqatigalugu
Meeqqat inersimasullu 400-t missaanniittut Rosa & Rødderne Katuami nuannisaqatigaat. Taakkua aliikkusersuipput, tassani meeqqat inuusat tutittakkanik aalatillugit, meeqqallu arlallit aamma scenemeeqatigalugit.
Rosap naggataatigut bamsiummi ilaat inuuissiortippaa. Tassani angakkuakkamik kaagiliorpoq, maskiinalu qaqorsaammik pullartaliuut pullartanik aniatitsivoq.
Akorseqattaartartoq
NUIF-imi (Nuummi Inuusuttut Siuarsartut, aaqqiss.) aamma pisoqartitsisoqarpoq. Ualikkut qallunaaq aakorseqattaartartoq Jon-G-Lør aliikkusersuivoq, tatssanilu aamma nunarsuarmi sumi tamaani aliikkusersuiartorluni angalasarnerpassuani oqaluttuaralugit. Aaqqissuussinermi tamatumani nuannersumi meeqqat inuusuttullu 20-t missaanniittut peqataapput.
Naqqarmiut DJ-lu Aqqalu Engell NUIF-imi nalunaaqutaq 19.00 30-nik isiginnaartoqarlutik aliikkusersuipput. Unnuk taanna pisut nuannernersaraat svenskip-samip arnap inerinarsortartup inuusuttup Maxida Märakip hip hop-imik aammalu samet erinarsoriaasaannik "Joik"-imik erinarsornera. Tassani innuttaasut 70-it peqataapput.
Nanook
Tamatuma saniatigut Nordisk Koncert Kor Katuami tusarnaatsitsimmata inuit 200-t takkupput, tassanilu tusarnaartitseqatigaat rockimik nipilersoqatigiit Nanook, scenillu saavani inuppassuit katersuupput erinarsoqatigiit tusarnersut rockertartullu tusarnaarlugit.
Allaaserisap ataani kulturisiornermit assit takukkit.