LGBT Qaamaneq
Assit takukkit: Niviaq Korneliussenip LGBT Qaamanerullu naapinnerat pissarsiffiusoq
– Imminut ilisarisinnaavunga, atuagarlu torrallataangaarami sapiitsuliornerullunilu, LGBT Qaamaneq Nuummi Sankt Georgs Gildep illuutaani siullermeersumik ataatsimiititsillunilu oqalugiartitsimmat inuusuttut takkuttut arlallit oqarput
LGBT Qaamaneq anguteqatiminoortartut, arnaqatiminoortartut, angutinik arnanillu atoqateqartartut trans-illu peqatigiiffigaat. Taanna qaammatit tamaasa sisamanngornermi siullermik ataatsimiittarnernik aallartitseqqammerpoq. Tassani Niviaq Korneliussen qaaqquneqarpoq atuakkiaqqaava nuannarineqartoq Homo - Sapienne tusarfiginiarlugu oqaluuseriniarlugulu. Atuakkiami tamakkorpiaat sammineqarput, tassani anguteqatiminoortartut/arnaqatiminoortartut pingassut, angutinik arnanillu atoqateqartartoq ataaseq trans-ilu ataaseq pingaarnertut inuttaallutik.
– Isumaqarpung atuagaq pingaaruteqartorujussuusoq, pingaartumik inuusuttunut. Allarpassuit atuakkiap atuakkiatut pitsaassusaa eqqartorpaat, unnulli taanna atuakkap LGBT-nut inuusuttunut pingaaruteqassusia sammivarput, aaqqissuussisut ilaat Margit Sander Granlien unnuk aallarnerlugu oqarpoq.
– Ilissilu Nuummi LGBT Qaamanermeersut naapinnissaat qilanaarisimaqaara, Niviaq oqarpoq.
Qanilaartumik
Unnuup ingerlanerani takkuttut oqaloqatigalugillu atuakkamit immikkoortunik quianartunik annernarnerusunillu atuffiassisoqartarpoq. Ataatsimiinnermi pingaaruteqarput ilisarinninneq, akuerinninneq aammalu paasineqarsimasutut misigisimaneq. Qanilaartumik peqatigiittoqarpoq, ammasumik oqaloqatigiissutigalugu Nuummi Kalaallillu Nunaanni anguteqatimoortartuneq arnaqatimoortartuunerlu trans-iunerlu qanoq ittuunersoq.
Amerlasuut oqaatigaat Nuummi LGBT-mi peqataaneq ajornannginnerusoq, sulili aqqutissaq takeqisoq. Arlallit misigisarsimavaat imminnut oqaluuserileraangamik eqqaminni nipaarulluinnartartoq, Allallu oqaluttuarput Kalaallit Nunaanni illoqarfinni mikinerusuni nunaqarfinnilu ammasuunissaq ajornakusoortorujussuusoq, mattunneqarnissaq qinngasaarneqarnissarlu ersissutigineqartarmata.
Illoqarfinni anginerusuni anguteqatinoortartuuneq, arnaqatinoortartuuneq, arnanik angutinillu atoqateqartartuuneq trans-iunerlu atoruminarnerulersimagaluartut, naligiissumik pineqarnissamut aqqutissaq suli takisuujuvoq. Saqqumilaarnermik paasinninnermillu pilersitsiniarluni assigiinngitsorpassuarnik suliniuteqarnissaq pisariaqarpoq.
LGBT Qaamanermit tunissut immikkut ittoq
Niviaq immikkut ittumik tunissuteqarfigineqarpoq - allattaavik immikkut puisip amianik qallerlugu sanaaq, peqataasunit tamanit inuulluaqqussutitalik. Tamarmik allassimapput atuagaq qanoq namminerminnut pingaaruteqartigisimanersoq. Inuulluaqqussutit ilaannit tigulaakkat:
– Isinik ammaasoq. Isumassarsisitsisoq. Sapiitsumik silatuumillu allataq. Atuarnera qatsussinnaanngilarput. Allaanngilaq sinnerlunga oqaluttutit. Neriuppunga inuusuttunussaaq iluaqutaassasoq. Torrallatarujussuuvoq. Atuakkiat atuarlugu ilukkut nuannaarnerujussuarmik misigisimavunga. Imminut kinaassusera nittarsaakkusulerpara. Qujanaq.
Inuulluaqqussutit takutippaat atuagaq HOMO Sapienne atuartunut tamakkununnga, atuakkami imminnut ilisarisunut - minnerunngitsumik kalaalisuuani - qanoq pingaaruteqartigisoq.
Niviaq Korneliussen killitsissimasoq tunissummut unnummull isumassarsiornartumut oqiliallannartumullu qujassuteqarpoq.
LGBT Qaamaneq pillugu annertunerusumik atuarsinnaavutit peqatigiiffiup nittartagaani www.lgbt.gl
Assit ataani takukkit