VELLYD
Assit takukkit: Nipitu Musikskole aallartippoq
Nipilersornermik ilinniarneq sapaatip-akunnerinik marlunnik sivisussuseqartoq Qaqortumi Campus Kujallermi ingerlanneqartoq, naggataarnersiorluni katersortarfimmi tusarnaartitsinermik naammassineqassaaq
Erinnat aamma guitarernerit ulluni makkunani Campus Kujallermi pitsanngoriartortinneqarput.
Tassami NIPITU Musikskole aallartereerpoq - taanna inuusuttunut 12-niik 25-it ilanngullugit ukiulinnut akeqanngitsumik neqeroorutaavoq. Peqataasut ataasiakkaarluni aamma nipilersoqatigiinnermik misileraalluni aamma teoreertalimmik ilinniartinneqarput.
Siorna nipilersornermik ilinniartitsineq tiguneqarluarpoq, ukioq mannalu aaqqissuisut nipilersortartunik pikkorissunik katersuisimapput, taakku misilittakkanik, oqaatsitigut piginnaasanik, kulturikkut ilisimasanik aamma nipilersornermi tunniussassaqarput.
Inuusuttut imminut tatiginerat annertusigaat
Peqataasut tallimanngornermi juulip 22-ani naggataarnersiorlutik illoqarfiup innuttaasuinut, ilaquttaminnut ikinngutiminnullu tusarnaartitsissapput.
- Misilittakkat takutippaat, suliniut inuusuttut imminnut tatigissusaannik aamma nipilersornermik misilittaanissamik siunissamilu periarfissamik annertusititsisartoq, ilinniarneq ilanngullugu. Ataasinngornermi 25-it peqataapput, amerlanerusullu takkutissapput, Nunatsinni kulturimut inuusuttunullu peqatigiiffimmi suliniummik aqutsisoq, Ivalo Parbst Frederiksen ilisimatitsivoq.
Aningaasaateqarfinnit tapiissuterpassuit
NIPITU Musikskole PIP-mit aaqqissuunneqarpoq.
Suliniut Kommune Kujalleq aamma Campus Kujalleq suleqatigalugit ingerlanneqarpoq, Nuna Fonden, Den Grønlandske Fond, Augustinus Fonden, Tips og Lottomidlerne, Kommune Kujalleq, Brugseni, Grønlands Rejsebureau, Royal Greenland aamma Blue Ice aningaasaliisoralugit.