Ilulissat
Assit takukkit: Nakuusa meeqqanut ataatsimeersuartitsivoq
Nakuusap meeqqanut ataatsimeersuartitsinerani atuarfiup pitsaanerulernissaa sammineqassaaq
Nakuusap aaqqissuussaanik ulluni makkunani Ilulissani meeqqat ataatsimeersuartinneqarput.
Meeqqat 13 aamma 18-it akornanni ukiullit 46-it kommuninit sisamaneersut Hotel Arcticimi Ilulissaniittumi katersuutsinneqarput.
Meeqqat ataatsimeersuartinneqarneranni kikkunnut tamanut atuarfiup pitsaanerutilerneqarnissaa sammitinneqassaaq.
Piviusunik siunnersuusiussasut
- Sapaatip akunnerata ingerlanerani meeqqat 46-t piviusunik siunnersuusiortinneqassapput, siunnersuutilli taakku atuartitaanerup pitsanngortinnerunissaanut tunngassallutik. Siunnersuutiliat taakku Atuartitaanermut Naalakkersuisumut, Nivi Olsenimut, nassiunneqassapput taavalu kommunerisanut sisamaasunut kommunalbestyrelsiinut aamma ingerlatinneqassallutik, Nakuusa tusagassiiutinut nalunaarummi allappoq.
Meeqqat ilaasut kommunerisaminni Meeqqat Isummersorfiinut ilaasortaarrapput taamaattumillu siunissaq eqqarsaatigalugu ilinniartitaaneq meeqqallu pisinnaatitaaffii ataatsimeersuarnerminni sammisussaallugit.
Peqataasunut pikkorissartitsineq
Nakuusami programimut aqutsisoq Arnavaraq Jørgensen ilisimatitsivoq, meeqqat ulluni pingasuni pikkorissartinneqassasut, pikkorissarnerillu nammineq meeqqat allat sinnerlugit oqaaseqarsinnaanngornissaannik siunertaqartoq.
Meeqqat ataatsimeersuarnerat arfininngorpat naammassissaaq.
Uani allaaserisap ataani assit takukkit