Assit takukkit: Meeqqat pisinnaatitaaffii kujataani malunnartinneqarput

Arfininngormat Nakuusa-p, ulluni makkunani ukiumoortumik Qaqortumi ataatsimiittup, meeqqat isummersorfiannut ilaasortai angallammik Alluitsup Paa-nukarput meeqqat pisinnaatitaaffii malunnartinniarlugit.
Pisarnertut isummersortarfimmi ilaasortat ingerlaaqatigiipput qilaaserlutik suaartarlutillu ´Suli anaanamik - suli ataatamik. Yes!´, qaqqat akisuatillugit. Nunaqarfiup meerartai ingerlaaqatigiinnut akuliupput, peqatigiillutillu timersortarfiliarput tassani nuannisaqatigiillutillu pinnguaqatigiillutik.
Nunaqarfimmi ingerlaaqatigiinnerup kingorna Meeqqat Isummersorfiat arsaattarfiup eqqaani NAKUUSA-p inussuanik sanapput. Meeqqat Isummersorfiat meeqqat pisinnaatitaaffii pillugit oqalugiarpoq, Nakuusa-llu paasisitsiniutissaa tulleq saqqummiullugu, qulequtserneqarsimasoq ´YES´, tassuunalu meeqqat pisinnaatitaaffiinik paasissutissinneqassapput.
Ataatsip missaani angalaqatigiit puiasumut Uunartumukarput, puigukkiutassaminnillu tatsimi kissartumi nalunnguarlutik. Qaqinissaq orniginanngikkaluaqaaq, siallilerporli. Naggataatigullu angalaqatigiit Qaqortumukarput qasuersaarlutillu, ullumi sapaammi juunip aallaqqaataani meeqqat ulluata malunnartinniarnissarsuanut.
Ulloq malunnartinniarneqarlunilu nalliussineqassaaq Qaqortup Timersortarfissuani nalunaaqutaq 13.00. Tassani Nakuusa, UNICEF, politiit, Inooriaatsimik suliniut Peqqik, MIO, aamma Foreningen Grønlandske Børn nittarsaaveqassapput. Qaqortup siunissaanik meeqqat takorluugaat plakatitigut takutinneqassaaq, atuartut erinarsussavaat ´Me are the world´, klubbimi nipilersortartut Nakuusa-p erinarsuutitaava atussavaat, meeqqat isummersorfiannit oqalugiartoqassaaq kingornalu borgmesteri oqalugiassalluni. Meeqqat Ulluat naggaserneqassaaq timersortarfissuarmit illoqarfiup qeqqanut ingerlaaqatigiinnermik, tassani Nakuusa-p inussua sananeqassalluni.