sikukkut aqqutissiuineq
Assit takukkit: Knud Rasmussenip siku aserorterlugu aqqutissaliortoq
Umiarsuup alapernaarsuutit Knud Rasmussenip Pajuttaat aamma Anguteq Ittuk nioqqutissanik nutaanik usisut sikukkut aqqutissiuppai
Ippassaq Uummannaq aamma ullumikkut Qeqertaq Royal Arctic Linep Pajuttaataanik aamma Anguteq Ittummik nioqqutissanik nutaanik pajunneqarput.
Taakku pajuttaatit umiarsuup alapernaarsuutip Knud Rasmussenip sikukkut ikiorpai.
Atuaruk: Pajuttaat Uummannamut nioqqutissanik tikiussivoq
14 tiimit
Ataasinngornermi unnukkut arfinernernut Pajuttaatip Uummannap tungaanut siku aserorterlugu ingerlaarnini aallartippaa, umiarsuup naalagaa, kaptajnløjtnant Steen Kempf-Amkær paasissutissiivoq.
- Illorsuit kujataanit sikup killinganit Uummannap tungaanut sikup aserorternera 14 tiimit missaanik sivisussuseqarpoq, umiarsuup naalagaa oqaluttuarpoq.
- Ukiuunerani nioqqutissanik Uummannap illoqarfianut nunaqarfiinullu nioqqutissanik Pajuttaaq tikiussivoq. Nioqqutissat akuliulluarsimasut, Sofia Geislser KNI-meersoq ilisimatitsivoq.
Qeqertamut ingerlaartoq
Uummannami niooqqaareerluni Pajuttaat Uummannap kangerluanit ingerlaqqippoq, ullumikkullu Qeqertarsuup Tunuatigut Qeqertap tungaanut ingerlaarpoq. Anguteq Ittuk aamma ikiorneqarpoq. Pajuttaat tassanngaanniit Aasiannut ingerlaqqissaaq.
- Knud Rasmussenip 19-nik inuttaqartup ullumikkut Pajuttaat siku aserorterlugu nunaqarfiup Qeqertap tungaanut aqqutissiuuppaa, Steen Kempf-Amkær ilisimatitsivoq.
- Saniatigut aamma nunaqarfinnut pajuttaat Anguteq Ittuk Qeqertap tungaanut ingerlaaqatigaarput. Taanna Pajuttaatip tunuani ingerlaarpoq, umiarsuup naalagaa ilisimatitsivoq, naatsorsuutiginerarpaaluKnud Rasmussenip unnugu ikiuinini naammassissagaa.
Suliaq pitsaasoq
Pajuttaat Qeqertamut nioqqutissanik assartuinngitsoq, Anguteq Ittulli kisimi pajuttoq, Sofia Geislser ilisimatitsivoq.
Illuanilli Inga Egede Royal Greenlandimeersoq ilisimatitsivoq, Qeqertami aalisakkeriviup qerititsivia tunisassianik piareereersunik imaqartoq Pajuttaatip imaarumaaraa.
- Pajuttaat ullumi marlunngornermi Qeqertamukassaaq qalerallit 59 tonsit aallugit. Taanna januaarip pingajuanni nunaqarfimmut uteqqissaaq tunisassianik piariikkanik aallerluni, Inga Egede oqarpoq.
Knud Rasmussenip taamaalilluni aalisartut tunisiinnarsinnaanerat aamma aalisakkerivimmi suliinnartoqarsinnaaneranik qulakkeerinneqataaffigaa.
Steen Kempf-Amkærip ilanngullugu oqaatigaa, Knud Rasmussenimi inuttat suliaq pissarsiaqarfigilluarsimagaat, piffimmik ilikkagaqaramik, ilaatigullu sikumi qajannaatsumik angalanissamik sungiusarlutillu piginnaasat pitsanngorsaramikkit.