Assit takukkit: Kiisami ajugaapput

– Ilorraallannartorujussuuvoq. Tassa atorfissaqartitavissuarput. Taamatut oqarpoq sungiusaasuuneq Jakob Larsen, arfininngormat GOG Arena-mi pissangaqisumik Århus Håndbold-imut unammereernermik kingorn, tamatumani GOG 30-27-mik ajugaammat, muminnermi 15-15-eqqareerlutik.

Isiginnaartut 1.075-it angerlarsimaffimminnilu tv-kut isiginnaartut tusintilikkaat minutsini 60-ini tamani unamminermik tamaviaarfiusorujussuarmik isiginnaartinneqarput.

GOG-mi unammisartut tatineqartut aallaqqaataaniilli takutippaat ajorsarnitik naammalersimasut, slutspil-imullu anngunnissartik suli sinnattoralugu. Minik Dahl Høeghip unamminerup aallartinneraniilli takutippaa sapaatip akunnerani kingullermi Rundens Hold-imut ilanngunneqarsimanini nalaatsornerinnaanngitsoq. GOG 5-2-mik siuartillugu isertitsimmat neriullarnartorujussuuvoq.

Arhus Håndbold-ip sungiusaasuunerata, assammik arsallammassuusimasup Erik Veje Rasmussenip unammisartuni allanngortippai, århusimiullu 8-6-imik siuarput. Unamminerup immikkoortuata siulliup sinnerani naligeeqalutik ingerlapput, tamarmillu ajugaasinnaapput.

Immikkoortup aappa

Unamminerup immikkoortuata aappaata aallartinnerani unammineq allanngorpoq. GOG arlaleriarluni ajuunnernik marlunnik pingasunillu siuartarpoq. Pingaartumik GOG-p målmandertaava Frank Mikkelsen arsarluartorujussuuvoq. Arlalippassuarnik torrallavillugu annaassisarpoq.

Ilaatigut unamminerup naajartulernerani Århus Håndbold-ip isertitsinerpaasua Rasmus Nielsen appakaativilluni isertitseriarmat annaappaa, GOG-lu kiisami ajugaaqqippoq.

Minik Dahl Høegh arfinilinnik isertitsivoq.

Tullianik Kolding

Pngasunngorpat oktobarip 22-anni GOG unammeqqeriissaaq. Håndblodliga-mi siuttut KIF Kolding København unammiartorlutik tikissapput. Tassani pokalinnanniunnermi kvartfinale ingerlanneqassaaq.

Assit ataani takukkit