futsal
Assit takukkit: Kalaallit arsaannermik isumalluarnartut katersuupput
Kalaallit 17-it Danmarkimi ilinniagaqartut arsaannermik isumalluarnartut poorskikkunni arsaannermik sungiusarlutik katersuupput
Efterskolertut amerlanersaapput Niuernermik ilinniarfimmi ilinniagaqartunik ilaqarput. Ilaat sportscollege-mi najugaqarput. Pineqartut 17-it tamarmik Kalaallit Nunaanneersuupput Danmarkimilu ilinnigaqartuullutik. Tamarmillu arsaanneq nuannarisaraat.
GBU-p, Kalaallit Nunaanni Arsaattartut Kattuffiata, poorskikkunni nukappissat 16-19-inik ukiullit poorskikkunni Svendborgip kujataani Tårsinge-mi arsaannermik sungiusartillugit katersortippai. Ulluni siullerni pingasuni futsal-imik sungiusartinneqarput.
Sermitsiaq.AG tallimanngormat ualikkut pulaarmat DBU-p futsal-imik ilitsersuisua Tai Pundik ilitsersuisoralugu futsal-imik sungiusarput. Sukkasuumik arsariaatsimi teknikkikkullu piumasaqarfiusumi Tai Pundik ilitsersuillunilu siunnersuiuarpoq.
– ´Sukkasuumik tunniussisarlusi´, ´isikkasi marluk atorlugit isimmitseriarneq iinniarsiuk´, ´alusi atorlugit´, tassa Tai Pundik-ip sungiusakkaminut uteqattaartuagai. Tai Pundik Sermitsiaq.AG-mut itisiliivoq, ilaatigullu oqarluni:
Futsal-imik arsaanneq ima sukkatigaaq arsap qanoq iliornissaa siumut pilersaarutigineqarsinnaanani. Tamanna aatsaat pisarpoq arsaq tigullugulu. Araaattartunut ataasiakkaanut inissaqarpianngilaq. Eqqaamajuk silami arsaattarfimmi ataatsimi futsal-imik arsaattarfiit arfineq-marluusinnaahmmata. Isumaliutersuutigigaanni assigiinnarpaa silami arsaattarfimmi holdini tamani arsaattartut 37-it unammisut.
Sungiusarnerinnaanngitsoq
Niklas, Larsêrak, Karl Louis, Aputsiaq, Asser, Herluf, Minik, Kristian arsaattartullu allat sungiusaatut pingasut Tekle Ghebrelul, René Olsen aamma Kent Kielsen peqatigalugit Svendborg Sund Camping-imi najugaqartinneqarput. René Olsen oqaluttuarpoq:
– Taktik-ersorneq sammisimavarput. Peqatigiissinnaaneq sulissutigisimavarput. Oqaloqatigiissutigisimavarput silatuumik nerisaqarnissaq imigaqarnissarlu qanoq pingaaruteqartigisut. Soorunamilu angusaqartoqarsinnaanngilaq iluamik sungiusanngikkaanni. Kalaallit Nunaanni arsaanneq pitsaasumik ineriartortuinnassappat pikkorissorujussuarnik sungiusaasoqartariaqarpoq, taamaattumik pingaaruteqarluinnarpoq: Sungiusaasunik ilinniagaqartitsiuarnissaq.
Misigisat nuannersut
– Sungiusaqatigiinnermi peqataaneq manna tikillugu nuannerluinnarsimavoq, 18-inik ukiulik Nuummeersoq Niklas Thorleifsen Sermitsiaq.AG-mut oqaluttuarpoq. Niklas Thorleifsen Viborgimi handelsskolimi atuarpoq. Viborg FF-imi 1. divisionimi unammisartumi U19-imi unammisartuuvoq.
Niklas Thorleifsen Kristian Lethilu sungiusaasoq Tekle Ghebrelul arfininngormat (ullumi, aaqqiss.) P4 Fyn-imi ullaakkut radio-miipput Kalaallit Nunaanni arsaanneq Tåsingemilu sungiusaqatigiinneq oqaluttuaralugit. Niklas-ip Kristiaallu isertuutinngilaat arsaanneq pimoorukkitsik, soorunamilu sinnattorigitsik nunanut allanut unammisartunut peqataasalernissartik.
Sisamanngornermi illernartumi sungiusaqatigiit tamarmik GOG Arena-mi isiginnaariarput. GOG-p Ålborg Håndbold-imut ajorsarmat isiginnaarlugu. Nukappissat namminneq takuvaat timersullammanngussagaanni piumasaqaatit qanoq annertutiginersut.
Ivikkanillu qallikkami
Sungiusaqatigiinnermi ullut kingulliit pingasut Tåsinge forende Boldklubbers-ip silami arsaattarfiini ingerlanneqassapput.