assinik saqqummersitsineq
Assit takukkit: Italiami assinik saqqummersitsineq
Assinik saqqummersitsineq 'Arctico' sapaatiummat ammaanersiorpoq - Ultima Frontiera Venedig-mi Italiap avannarpasissuiani. Saqqummersitsineq assinik qalipaateqanngitsunik issittumi avannarlermi assilisaapput - tassani Carsten Egevangip Kalaallit Nunaanni assilisai ilaallutik
Kalaallit Nunaanni assilisat Italiap illoqarfiisa ilaanni Venedig-mi saqqummersinneqarput.
Saqqummersitat 120-nik amerlassusillit assiliisartunit pingasunit assilisaapput. Assiliisartoq Carsten Egevang assiliisartoq italiamiu tusaamasaq Paolo Solari Bozzi Ragnar Axelssonilu Islandimeersoq peqatigalugit saqqummersitsipput.
Saqqummersitsinermi issittumi avannarlermi silap pissusiata allanngoriartornera qulequtaraa. Kalaallit Nunaanni, Islandimi Sibiriamilu innuttaasut ulluinnaat uumasullu atugaat ersersinniarneqarlutik.
- SIlap pissusiata allanngoriartornera qanoq kinguneqarnersoq nunarsuarmiooqataasunut paasititsiniutigissallugu aatsaat taama pingaaruteqartigilersoq isumaqarpunga. Nunarsuup kiannerulernerata uumasut inuilluni inuunerannik allanngortitsivoq. Ukiarlu 2016/2017 aatsaat taama kiatsigaaq, Kalaallit Nunaanninnaanngitsoq nunat avannarliit tamakkerlugit, Carsten Egevang oqarpoq.
Soqutigineqarluarpoq
Venedig-mi saqqummersitsineq soqutigineqarluartoq aamma oqaatigaa.
- Ippassaq (arfininngorneq aaqq.) tusagassiortunik katersortitsigatta soqutiginnittut amerlapput. Saqqummersitsinerlu ammaanersiorneqarmat immikkut qaaqqusat illup quleriinni pingasuusuni portussuseqartoq ulikkaavippoq.
- Tulluusimaartorujussuuvunga Kalaallit Nunaanilu assilisakka nunani allani saqqummersitsinermi ilannguneqarsinnaammata nuannaarutigalugu. Venedig-mi saqqummersitsinissamut sinaakkutarineqartut immikkuullarissorujussuupput. Venedig-mi Europap kulturikkut qiterivaa, saqqummersitsivillu assilisanut tulluartorujussuulluni, Carsten Egevang oqaluttuarpoq.
Allaaserisap ataani assit takukkit