ajutoorneq
Assit takukkit: Issittumi Sakkutooqarfik kilisaammik ikiuivoq
Assit pissanganartut takukkit aammalu Issittumi Sakkutooqarfiup kilisaatip Saputip aseruanera pillugu oqaluttuaa atuaruk
Issittumi Sakkutooqarfiup kilisaatip oquutarniartup iluliamut apornerata kingorna, allaganngorlugu pisumik oqaluttuaq pillugu Sermitsiaq.AG attaveqarfigaa.
Issittumi Sakkutooqarfiup tungaanit pisoq, sapaatiummat februaarip 21-ani nalunaaqutaq 22:32 aallartippoq, tassani JRCC Halifaximit (Joint Rescue Coordination Centre red.) Canadamit nalunaarfigineqarput.
Immattoq
Canadamiut kilisaataat SAPUTI Davisstrædetimi aalisartilluni sikumut aporsimasoq, taakku oqaluttuaraat.
Kilisaat putusimavoq, usilersortarfikkullu immalluni.
Atuaruk: Kilisaat iluliamut aportoq
Video takuuk: Canadamiut kilisaataat ima annaanneqarpoq
Canadami annaasiniaasartut Nuummut ilisimatitsipput, umiarsuaq Kalaallit Nunaata imartaata tungaanut ingerlaartoq ikiortikkiartorluni.
Silaannarmit ikiuineq
Issittumi Sakkutooqarfiup umiarsuaq alapernaarsuut Knud Rasmussen Saputip sumiiffiata tungaanut aallartippaa, kilisaat Nuup tungaanut ingaqatiginiassammagu.
Tamatuma saniatigut kilisaatip nammineq imaajarnera maammanngitsoq, inuttat nalunaarutigereeraallu, canadamiut silaannakkut kilisaammut ikiuipput.
Ataasinngornermi februaarip 22-anni Saputi silaannakkut nakkartitsisoqarneratigut imaarsaatinik sisamanik pissarsivoq. Canadamiut tusagassiorfiisa aamma nalunaarutigaat, qulimiguulimmit imaarsaatit tallimat tunniunneqartut.
Imaarsatit arlallit
Ataasinngornermi februaarip 22-anni nalunaaqutaq marlup missaani umiarsuaq alapernaarsuut Knud Rasmussen kilisaatip eqqaanut pivoq.
Umiarsuup annaassiniaasartui kilisaatip ajoqutaanik misissuiartortinneqarput. Aseruanermut iluarsartuussutit aamma imaarsaatit allat qallunaat sakkutuuinit Saputimukaanneqarput.
Saputip Nuummut ingerlaarnini nangippaa - maanna ingiaqateqarluni.
Malerujussuit
- Piffissami tassani nalilerneqarpoq, kivinissaanut ulorianartorsiortoqanngitsoq, piffimmi sila ajorpallaanngimmat, sakkutooqarfik allappoq.
Marlunngornermi februaarip 23-anni nalunaaqutaq arfernup missaani Issittumi Sakkutooqarfik umiarsuarmit alapernaarsuummit nalunaarfigineqarpoq, sakkortuumik iisaqusannerup umiarsuaq puttatinnissaa ajornarsisikkaa.
Issittumi Sakkutooqarfiup aalajangiuppaa, Air Greenlandip qulimiguuliutaa Kangerlussuarmit Nuummut nuunneqassasoq, qulimiguulik atorfissaqalissappat qaninneruniassammat.
Navianartorsiorneq
Nuummi kisianni silarluppoq, qulimiguulillu Maniitsumukartinneqartariaqalerpoq. Akunneq ataaseq qaangiuttoq umiarsuup Knud Rasmussenip nalunaarutigaa, Saputimi ‘navianartorsiortoqartoq, kisianni allanngorartoqarani, imaarsaatit sukkanerusumik ingerlasinnaanngimmata.
Atortut umiarsuarmiittut atorfissaqanngitsut inuttat eqqarlugit aallartissimavaat, qimagussornissamullu piareersimallutik.
Umiatsiaq pullattagaq aserortoq
Inuttat sisamat umiatsiamik pullattakkamik Knud Rasmussenimut qimagussortinneqarput, taamaaliornerulli nalaani umiatsiaq atorsinnaajunnaarluni aserorpoq.
Silarlunneratalu umiarsuarmit alapernaarsuummit annanniut aqqartinnissaanut ajornakusoortissimavaa.
Issittumi Sakkutooqarfiup aalajangiuppaa, Air Greenlandip annaassiuniutaa qulimiguulik umiarsuit tungaannut aallartinniarlugu aamma inuttat ilaat sakkutuut umiarsuaannut qaqitsinniarlugit.
Annertuumik sanimut ueqqasoq
Qulimiguullip umiarsuit marluk tungaannut ingerlaartilluni uniinnartariaqalerpoq, qulimiguullip sermersoornissamut ulorianartorsiornera pissutigalugu.
Qulimiguulik sivitsunngitsoq Nuumut mippoq, silagissiiartorluni. Taarsiullugu canadamiut timmisartuat alapernaarsuitinneqarpoq.
Kilisaat Knud Rasmussenimik ingiaqateqarluni Nuummut ingerlaarnini nangippaa, immaqqinnissarlu pinngitsoorniarlugu kigaatsumik ingerlaarpoq.
'Well done'
Akunnerpassuit sulisoqareerneratigut, Sakkutooqarfillu naapertorlugu ‘ilungersorluni imarsiortullu pitsaanerisigut’ marlunngornermi nalunaaqutaq unnukkut arfineq-pingasup missaani Saputi Nuummi umiarsualivimmut pitinneqarpoq.
Nunap tungaanut ingerlaarneq kingulleq politiit angallataat Sisak peqatigalugu naammassineqarpoq.
Ullumikkut pingasunngornermi ullaap tungaani kilisaatip naalagaanit, Wayne Mansfieldimit, ikiuuttunut nersualaarinnittoqarpoq.
Aquttoq qujamasuttoq
- Nunamut apuunnissatsinnut ikiuuttut tamaasa qutsavigerusuppakka. Nunaminngaanniit ikiuuttunit Knud Rasmussenimi inuttanut pingasunut ikillutik angallatitsinnik annaassillutik ikiuuttut tamaasa ilanngullugit. Aamma timmisartut annaassiniartartut 333, 332 aamma 616 qujaffigerusuppakka. Taakku sukkassusaat suliaminnullu pikkorissusaata naatsorsuutikka qaangerlugit iliuuseqarput. Annaassiniarnermik aaqqissuussineq nunat marluk akornanni pitsaaqaaq. Sulinersi torrak! Torrassuaq! Tamassinnut qujanaq, kilisaammi aquttoq oqarpoq.
- Issittumi Sakkutooqarfimmit Knud Rasmussenimi inuttanut ‘well done’-imik nersualaarinnippugut, aammalu Joint Rescue Coordination Centremik Halifaximiittumik tapersersorneqarnitsinnut suleqateqarnitsinnullu qujanaq, Canadamiut timmisartortartut sakkutuui, Air Greenland aamma politiit, Sakkutooqarfik Sermitsiaq.AG-mut allappoq.
Aamma takukkit:
Video takuuk: Canadamiut kilisaataat ima annaanneqarpoq