Assit takukkit: Inuusuttut eqqumiitsuliortut Arctic Winter Games postkortiliortut

Inuusuttut sisamat eqqumiitsuliortut Arctic Winter Games-Go Cardsinik arfinilinnik suliaqarput.

Tassaapput: Ivínguak’ Stork Høegh, Kristine Kreutzmann, Lisa Kreutzmann aamma Poul Møller, tamarmik Nuummi Eqqumiitsuliortut Ilinniarfianni ilinniartuusimasut.

Iluaqutaasumik suliaqartut
Arctic Winter Gamesimut aalajangiinermi tunngavik pingaartoq tassaavoq, Go Cardsit inuusuttunut eqqumiitsuliortunut suliarisassiissutigineqarnerat. Taamaaliornikkut eqqumiitsuliortutut piginnaasaminnik ineriartortitsinerisa saniatigut Nunatsinnut iluaqutaasumik suliaqarput.

- Go Cardsit arfiniliusut takutippaat eqqumiitsuliortut namminneq Arctic Winter Games 2016-ip oqaasinnaavanut ‘Peqataagit - Misigisaqarit - Pissigit’-mut qanoq nassuiaateqarnertik. Go Cardsit Arctic Winter Games 2016-mi pisussanut paasisaqartitsipput. Qanga Inuit pinnguaataat kiisalu ullutsinni ukiuunerani timersuutit imminnut akoorluarneqarput, pisortamut tullersorti Arnakkuluk Jo Kleist tusagassiorfinnut nalunaarummi taama oqarpoq.

Nillataartitsivik
Go Cardsit pineqartut assersuutigalugu qallunaat cafévini atorneqarput, sutoriartut tigusinnaasaat akeqanngitsut. Atorneqarsinnaapput kusassaatitut, nillataartitsivimmut nivinngagassatut, imaluunniit allakkerisarfikkut nuannarisamut inuulluaqqussutitut.

Piffissami aggersumi, Arctic Winter Games 2016 ukioq tulleq marsimi ingerlanneqareernissaata tungaanut, Nuummi café-ni sumiiffinnilu aalajangersimasuni Go Cardsit pissarsiarisinnaassavatit.

Januar 2015-mi Tele-Post kiisalu Arctic Winter Games 2016 saqqummersippaat frimærki AWG2016-mut iluaqutaasussaq. Frimærkimik saqqummersitsineq nangitseqartillugu postkortit arfinillit angisuut kusanartut saqqummersinneqarput.

Aamma atuaruk: Tele-Postip AWG2016-imut nipitittagaq saqqummiuppaa

Allaaserisap ataani postkortit takukkit