Qaqortoq
Assit takukkit: Inuppassuit Bent Ole Kleistimut ataqqinninnerminnik takutitsipput
Politiit immikkoortortaqarfiani pisortaq Johan Davidsen ilisinermi eqqaaniaalluni oqalugiarpoq
Bent Ole Kleist, Vaava, Qaqortumi ataasinngornermi ilisaammat inuppassuit takupput.
Ilaquttat peqataanerisa saniatigut aamma politiini suleqatit, aamma amerlasuut ungasissumit tikittut ataqqinninnerminnik naggammik takutitsiartorput.
Ajoqi Jakobine Motzfeldt ilisinermi naalagiartitsivoq, tassanilu pisortaq Johan Davidsen, Vaavap ukiuni 38-ini suleqatigisimasaa misigissutsikkut attortinnartumik eqqaaniaalluni politiit sinnerlugit oqalugiarpoq.
Ernera ingiuivoq
Ilisinerup kingorna katersortarfimmi kaffisortitsisoqarpoq. Tassani - Bent Ole Kleistip kissaataa malillugu - Vaavap erneranik, Johan Aavaat Kleistimik, ingiuisulerluni erinarsortoqarpoq, kiisalu Karl Lynge nutsugiarpoq.
Neriuffimmit najukkami immikkoortortaqarfimmi siulittaasua aamma qujaniutitut oqalugiartoqarpoq, tassami Vaava peqatigiiffimmi suliniuteqartuusimavoq, kræftimik eqqugaasunut ilaqutaannullu piffissangaatsiaq atorlugu oqaloqatiginnittartuulluni.
Vaavap nuliani, Nukaaraq Kielsen Kleist, aamma meeqqatik ernuttanilu qimappai.
Allaaserisap ataani assit takukkit