assammik arsarneq
Assit takukkit: GOG pissanganartumik unammeqqittoq
Arfininngormat ualikkut unamminermi sakkortuumi tamaviaarfiusumilu, pingasunik peersitaasoqarfiusumi, GOG Århusimi unamminermi ataatsimik pointinnappoq
Danmarkimi angutit håndboldliga-anni grundspillimi unamminerit aalajangiisuuffiusut kingulliit ingerlanneqalerput. Sapaatip akunnerata naanerani unamminerit kingorna holdit tamarmik unamminerit pingasuinnaat amigaatigilerpaat. Grundspillimi qaffasinnerpaat arfineq-pingasut slutspil-imut ingerlaqqissapput. Slutspil-imut anngunnissaq klubberpassuit sæsonimi anguniagaraat.
Arfininngormat ualikkut Århusimi unammisarfissuarmi NRGI Arena-mi unamminissaq sioqqullugu GOG normu 7-tut inissisimavoq - Århus Håndbold-imidt pointimik ataasiinnarmik siuarsimalluni. Unamminermi naligiiginnaramik GOG normu 7-tut inissisimaannarpoq.
GOG-p malersuisui Ribe-Esbjerg HH aamma Århus Håndbold pointimik ataasiinnarmik inorsarput, SønderjyskE-lu pointinik marlunnik inorsarluni, taamaattumik qanorluunniit pisoqarsinnaavoq.
Pointit pingaarutillit unammissutaapput
Unammineq aallartiinnavissoq arfininngormat ualikkut Århusimi isiginnaartunit 2200-t missarpiaannit malugineqarsinnaavoq unammineq holdinut taakkununnga marlunnut pingaaruteqartorujussuusoq. Aallaqqaataaniilli sakkortuumik unammipput. Torrallavillugu isertitseriartoqartarpoq. Streg-imiittunut fløj-imiittunullu tunniusseriataartoqartarpoq.
Arsaq annaaneqaqattaartarpoq, minnerunngitsumillu målmandit annaassilluaqattaartaqaat. Unamminerup immikkoortuani siullermi Århus Håndbold tallimariarluni straffertitaavoq. GOG-p målmandiata Søren Haagen-ip pingasut annaappai. Pingaartumik Søren Haagen unammilluartorujussuvoq.
Peersitaasut pingasut
Pingasullu anisivillugit anisinneqarput: Unamminerup immikkoortuata siullip qiteqqunnerani Århus Håndbold-imeersoq Rune Ohm anisitaavoq, sekundinilu kingullerni Århus-imeersoq Henrik Hansen anisitaavoq, Minik Dahl Høegh sakkortuvallaamik pimmagu. Saassussineranni piaaraluneerluni uppitillugu!
Minik Dahl Høegh aamma anisitaavoq. Dommerit isumaqarput Henrik Hansen tillussimagaa. Videomili immiussatigut taamaanngitsoq takuneqarsinnaavoq. Taamaattumik Sermitsiaq.AG-p paasisai malillugit Malik Dahl Høegh karantæne-rtinneqassanngilaq. Attuineq sakkortugaluartoq Minik Dahl Høegh ajoqusersimagunanngilaq.
Unammineq naligiiffioqisoq
5-5, 8-8 muminnermilu 12-12-erlutik. Taavalu 20-20, 22-22-eriarlutik kiisami minutsit pingasuinnanngortut GOG 22-24-mik siuaraluarpoq. Århus Håndbold 24-24-mut annguppoq, minutsinilu kingullerni marlunni isertitsisoqanngimmat unammineq 24-24-mik inerneqarpoq, sekundini kingullerni marluk aappalaartumik nittaavigineqarlutik anisitaavillutik anisitaallutik.
Unamminissamut program-imi Århus Håndbold-ip sungiusaasuata Erik Veje Rasmussenip unammineq taasimavaa grundspil-imi finalimi unamminertut, holdillu naligiiginnarmata slutspil-imut anngunniunneq suli pissanganarnerulerpoq.
Pissanganarnera nangeqqippoq
GOG-p sungiusaasua Jakob Larsen unamminerup kingorna qularuteqanngilaq, Sermitsiaq.AG-mullu imatut oqarpoq:
– Pissanganarnera nangeqqippoq, tullianillu unamminissatsinnut suut tamarmik unikaallatsinneqarput taanna kisiat sammillugu, tassani unammisarfitsinni KIF Kolding København-imut unammineq ajornakusoortoq ingerlatissagatsigu.
Minik Dahl Høegh arfinilinnik, Akutaaneq Kreutzmann-ilu marlunnik isertitsipput.