Danmarkimi assammik arsarneq
Assit takukkit: GOG-mi kalaallit 13-inik isertitsisut
GOG-p Skanderborgimut ajugaanerani Minik Dahl Høegh Akutaaneq Kreutzmannilu aqqutissiuisuupput
GOG sæsoni manna allat unammisarfianni ajugaasimanngilaq. Fynimiut allat unammisarfianni kingullermik ajugaapput siorna marsimi. Tamanna arfininngormat ualikkut allanngortinneqarpoq, Skanderborgimi unammisarfeeqqami Morten Børup Hal-imi.
Sungiusaasuunerup Jakob Larsenip unammisartuisa aallaqqaataaniilli pointinnakkusunnertik takutippaat, unammisartullumi aamma takutippaat kakkattortatik, isaatitsinerpaasartoq Nicklas Kirkeløkke assersuinermilu aqutsisoq Lasse Kronborg, marluullutik ajoquteqarlutik peqataanngitsut, ilaginagit saperatik. Minutsit 30-t marloriarlugit ingerlareersut GOG qularnaatsumik pisariaqartitaminik 29-20-mik ajugaavoq.
Minik Dahl Høegh aamma Akutaaneq Kreutzmann aallaqqaataaniilli unammeqataapput, isaatitsillualaavippullu. GOG 3-5-imik siuarsimasoq Akutaaneq Kreutzmann 3-6-imut isertitsivoq, Minik Dahl Høeghilu kingorna strafferluni marlunnik isertitsimmat GOG 3-mik siuarpoq. Muminnermi GOG 8-13-imik siuarsimavoq.
Unamminerup immikkoortuata aappaani GOG siuaqqajunaannarpoq. Skanderborg siuarsimasorujussuarmik illersuinialeraluarpoq. GOG-p aamma tamanna anigorpaa qularnaatsumillu 29-20-mik ajugaalluni.
Kalaallit 13-inik isertitsipput
Akutaaneq Kreutzmann sisamanik isertitsivoq.
– Minutsit qulit qaangiutiinnartut nalujunnaarpara kakkannerulluta. Assersuisut assersuilluarput tamannalu pissutigalugu Søren Haagen måliniittoq arlalissuarnik torrallallugit annaassisarpoq.
Minik Dahl Høegh qulingiluanik isertitsivoq unamminerlu tamaat tamaviaaqaluni. Minik Dahl Høeghip Akutaaneq Kreutzmannimik arsaqateqarluarnini nuannaarutigeqaa.
– Immitsinnut kakkatsippugut, arsaqatigiittarnerpullu pitsaanngoraluttuinnarpoq, isumaqarpungalu takutikkipput ataatsikkut unammiffimmi arsaqataasinnaalluta, Minik Dahl Høegh unamminerup kingorna Sermitsiaq.AG-mut oqarpoq.
Siusinnerusukkut Minik Dahl Høegh aamma Akutaaneq Kreutzmann sinnersaraallutik saamerlermi backiusaraluarput. GOG-mi ajoqusertoqarsimanera pissutigalugu Akutaaneq Kreutzmann piffissap ilarujussuani talerperlermi backiusarpoq, Skanderborgimilu unammilluaqaaq. Unammisartut taakkua marluk arsaqatigiittarnertik suleqatigiinnertilllu ineriartortippaat, kalaallillu nunanut allanut unammisartuini iluaqutaallualersinnaavoq.
Dorthe Kollo-p erinarsugaa puigorneqarneq ajortoq ´Gid du var i Skanderborg og blev der´, soorunami unamminerup kingorna højttalerikkut tusaaneqarsinnaavoq.
Ataani assit takukkit