håndbold
Assit takukkit: Faxe Kondi Cup aallartippoq
Sisamanngornermi arnat assammik arsaallutik unammiuaarneranni marloriarluni unammisoqarpoq
Ukioq manna Faxe Kondi Cup, arnat assammik arsaallutik unammiuaarnerat, sisamanngornermi unnukkut aallartippoq, taannalu ukiut 25-inngortorsiorpoq.
Unamminerit Nuummi Inussivimmi pipput.
Unammiuaarneq marlunnut aggulunneqarpoq. A-rækkemi GSS, NÛK aamma SAK peqataapput. B-rækkemi GSS hold 2, motionister kiisalu talentholdit peqataapput.
Unamminermi siullermi GSS 2 aamma motionisterne unammipput.
Unammisut naligiilluarlutik aallartipput, minutsillu tallimat missaat ingerlareersut aatsaat målertoqarpoq.
Atuaruk: Faxe Kondi Cupimi unammiuaarneq nalliuttorsiussaaq
Saassusseriasaarnermi målerpassuit
Tamatuma kingorna unammisut unamminerup immikkoortuani malittuinnaapput, tassani GSS 2 siuaqqalaaginnavillutik, motionistill malinnaapput.
Unamminerup immikkoortuata aappaani motionistit nukissatik atoreerpaat, GSS 2-kkormiullu saassusseriasaaqattaarlutik siuariartorusaarput. Marie Karlsen GSS 2-mi måliniittoq unammilluarpoq, motionistillu målertinngitsooqattaarpai.
GSS 2 unamminermi 27-19-imik ajugaallualaavippoq.
Ilimagineqartut qularnaatsumik ajugaasut
Unamminerup aappaani illoqarfeqatigiit unammipput. Tassani aaqqissuisut GSS-ip NÛK unammivaat.
NÛK-mi måliniittoq Vera-Lea Kristensen unamminerup immikkoortuani siullermi unammilluarpoq. Illuanilu GSS-ip illersuinini ataqatigiisissinnaanngilaa, taakku nalinginnaasumik nukittuumik inissisimasaraluarput. Tamannalu Christina Langep atorluarpaa, muminnermilu tallimaraarpoq.
Tamannali naammanngimmat, GSS muminnermi 12-9-mik siuaqqavoq.
Unamminerulli immikkoortuata aappaani unammisut pitsaassusaat assigiinngeqaat. NÛK saassussinermi kukkusaqattaarpoq, tamannalu GSS-ip atorluarlugu sukkasuumik saassussisaqattaarput. Unamminerup immikkoortuata aappaani pissanganartoqanngilaq - GSS 40-20-mik ajugaallualaavippoq.
Ullumi tallimanngornermi aamma unammisoqassaaq. Finalernerit sapaatiuppat pissapput.
Ullormut programmi aajuna:
- Nalunaaqutaq 19.00: Motionister - Talenthold B-række
- Nalunaaqutaq 20.30: SAK - GSS A-række
Allaaserisap ataani assit takukkit