takutitsineq
Assit takukkit: Atisalianik takutitsineq inoqarluartoq
Nuummi suliffeqarfiit qulit atisanik pinnersaasianillu marlunngornermi unnukkut takutitsinermi misigisaqartitsilaavissorput, taanna takornariartitsisartunut hunnorujulikkaanut Vest Norden Travel Martimut peqataasunut aaqqissuussaavoq.
Takornariartitsineq arfernik, ilulissanik pinngortitamillu takornariartitsinerinnaanngilaq. Nuummi niuerniarfinnik ingerlatsisut arlallit tamanna takornarialerisunut takutinniarsaraa.
Pisiniarneq aamma ilusilersuineq
- Takornariarpassuit maani illoqarfimmiikkaangamik pitsaasumik tunngaveqarlutik misigisartagaannik pisiniarfilerinermut aamma ilusilersukkanut tunngasumik amigaateqarsimavoq. Ilusilersuisarnermut kulturitsinnut attuumassuteqarpoq. Taamaammallu takornariartitsisartut illoqarfiit pingaarnersaanni qanoq neqerooruteqartoqarsinnaanersoq takutinnissaa pingaaruteqarpoq, Stine Selmer Andersen, Sermersooq Business Councilimi inuussutissarsiornermut siunnersorti nassuiaavoq.
Isiginnaartut 150-t missaanniipput, qisuariarnerallu pitsaasorujussuuvoq, takutitsineq GUX-imi takutinneqartoq takornariartitsisartut saqqummersitsinerannit nalinginnaasumik neqeroorutigisartagaannit allaannerummat.
- Ilanngussaq torraasoq amerlasuunit paasivarput. Suliffeqarfiillu peqataasut aamma ilusilersukkatik takutikkamikkit nuannaraat, Stine Selmer Andersen oqaluttuarpoq. Atisat takutinneqarnerisa saniatigut, pinnersaatit illumilu atortut takutinneqarput.
Taakku assigiinngitsut iluanni kalaallit nammineq kulturikkut nammineerlutik takutitsisinnaanerat saqqummiunneqarpoq, takornarissallu pinngortitamik misigisassarpassuisa saniatigut misigisassaqartillugit.
Ataatsimiinnerit
Takutitsisoqarnerata kingorna ilusilersuisartut takornariartitsisartullu akornanni ataatsimiittoqarpoq, tassanilu pisinissamut periarfissaqarluni.
Uani allaaserisap ataani assit takukkit:
Se fotos fra showet herunder artiklen: