Arsaannermi GM
Assit takukkit: Arnat GM-qarneranni I-69 siuartuuvoq
Arsaannermi arnat GM-qarneranni kikkut finalemut anngutissanersut suli nalunarpoq. Angusat assillu takukkit
I-69 Ilulissaneerasoq arnat arsaannermi Sisimiuni GM-qarneranni siuartuugallarpoq arfinilinnik pointeqarluni. Kugsak-45 Qasigiannguaniik aamma aallartilluarpoq siornali finalertut NÛK marlunngornermi arsanngikkallarput.
Radiokædep attaveerunneranit Sisimiut marlunngornerup ilarujussuaq eqqugaapput taamaasimmallu aaqqissuisut ataasinngornermi angusanik assinillu siammarteriniarnerat eqqorneqarpoq. Maannali attaviit pissusissamittut ingerlaqqilerput.
Aaqqissuisut S-68 ataasinngornermi ammaanermi FC Malamuk Uummannameersoq 2-1-mik ajugaaffigaat siornalu pissartaasut I-69 Ilulissaniik naligeeqaluni unamminermi NÛK Nuummeersoq 1-0-mik ajugaaffigalugu mumereernermi Karoline Malakiassen I-69-imik ajugaatitsilluni 1-0-mut isertitsimmat.
Isaatitsisut
Arfineq pingasoriarluni isertitsisoqarpoq unamminerit marlunngornermi nanginneqarmata Kugsak-45 FC Malamummut 2-0-mik ajugaammat.
Marlunngornermi unamminerup aappaa pissanganarsinngilaq I-69 aamma S-68 unammimmata tassanilu I-69 6-0-mik ajugaavoq.
GM-ip naggataarneqarnerani iligiit tallimat peqataasut tamarmik imminnut unammereerpata pointeqarnerit marluk finalemut anngutissapput.
Unamminerit aallarniutaasut tallimanngornermi naammassissapput sulilu nalunarallarpoq kikkut finalemut anngutissanersut.
Aajuku angusat
FC Malamuk – S-68 -1-2
NÛK – I-69 0-1
Kugsak-45 – FC Malamuk 2-0
S-68 – I-69 0-6
Aajuku pingasunngornermi unamminissat:
Nal. 16.00 I-69 – Kugsak-45
Nal. 19.00 NÛK – S-68
Assit allaaserisap ataani takukkit