Taekwon-Do-mi EM
Assit takukkit: Ajugaasoqarlutillu ajorsartoqarput
Kalaallit taekwon-do-rtartut sisamat europami pissartanngorniunnermi, ulluni makkunani Italiami ingerlanneqartumi, peqataapput
Italiami Andria-mi Taekwon-Do-mik EM ingerlanneqaleruttorpoq, tamatumanilu Kalaallit Nunaanneersut sisamat peqataapput.
Nunatsinnit peqataapput Tina Nikodemussen, Nuuk, Jonathan Jonathansen, Sisimiut, Helge Heilmann, Maniitsoq, aamma Angutinnguaq Tittussen, Nuuk.
Pissartanngorniunnerit sisamanngormat apriilip 30-anni aallartipput, tul unammissutigineqarluni. Kalaallit nunanut allanut unammisartut ajugaasoqarlutillu ajorsartoqarput, Sisimiuneersoq Lena Reimer, kattuffiup allatsia pissartanngorniunnernilu peqataasoq oqalutttuarpoq.
Sisamanngornermi angusat imaattut Lena Reimer-ip tusagassiorfinnut nalunaarutikkut oqaluttuaraa:
– Angutinngua Tittussen (Nuuk) sølvinnappoq.
– Helge Heilmann (Maniitsoq) kakkannerit ilaattut unammigaluarpoq, kingornali finalertussamut ajorsarami ingerlaqqinngitsoorluni.
Aamma Jonathan Jonathansen ingerlaqqinngilaq, unamminermini siullermi kingorna finalertussamut ajorsarami.
– Tina Nikodemussen (Nuuk) teknikkimi pitsaanersaagaluarpoq, kukkuninili pissutigalugu ingerlaqqinngilaq.
– Nunanut allanut unammisartuvut pissartanngorniunnerni amerlanerusuni peqataasartuuppata isumaqarpugut sungiussisimanerulissasut taamaasillunilu medalje-nannerusalerlutik, Lena Reimer oqarpoq nangillunilu:
– Kattuffik sponsorimik aalajangersimasumik amigaateqarmat malugineqarsinnaavoq unammisartut unammiuaarnernit anginerusunit misilittagaqarneq amigaatigigaat. Taamaattumik aalajangersimasunik sponsoreqalernissaq kattuffiup sulissutiginerulissavaa, taanna tikkuaavoq.
Ulluni allani angusat suli tigusimanngilagut.
Assit ataani takukkit.