Sulisartoqarneq
Assit takukkit: Aatsitassanik Ilinniarfimmi ulloq oqaluttuarisaanermut malunnaatilik
Nunatsinni piiaaffimmi svenditut maskinentreprenøritullu ilinniagallit siulliit allagartartaartinneqarput
Hans Hinrichsenip, Sisimiuni Aatsitassanik Ilinniarfimmi ilinniagaqartitsinermi pisortap, nunatsinni piiaaffimmi svenditut maskinentreprenøritullu ilinniagallit siulliit tallimanngormat allagartartaartippai.
Ilinniartut tamarmik soraarummeernerminni naammaginartumik angusipput, angusinerminnillu nersualaarneqarput.
Kunuk bronzenappoq
Taamatut ilinniagallit siulliit tassaapput Pauline Enoksen (Qaqortoq Entreprenørforretning), Elia Heilmann (Greenland Contractors, Thule Air Base), Kunuk Edvardt Jensen (BJ Enterprise, Sisimiut) aamma Aputsiaq Lennert (Larsen & Co. A/S, Nuuk).
Ukioq manna angusilluarnersaavoq Kunuk Edvardt Jensen, taannalu bronzemik medaljenatsinneqarpoq.
Aatsitassanik Ilinniarfimmi maskinentreprenøritut imaluunniit piiaaffimmi svenditut ilinniarfik ukiunik sisamanik sivisussuseqarpoq, ukiuni marlunni atuarfimmiilluni ukiunilu marlunni ingerlatsivimmi piiaaffimmiluunniit lærlingitut sulilluni.
Ilinniarfik ingerlatsilluartoq
Ilinniartut atuagarsortarput entreprenørillu maskiinaanik angisuunik ingerlatsinermi isumannaatsuunissaq ilinniartarlugu, nalunaarusianik allannermi matematik-imilu IT-p atornera ilinniartarlugu, aammalu qaartiterineq aqqisinniornerlu ilinniartarlugit. Nunatsinni pissutsit aammalu aatsitassarsiornermi entreprenøritullu ingerlatsinermi suliassat ilinniartitsissutigineqartarlutik.
Aatsitassanik Ilinniarfiup nalunaarutigaa pikkorissartitsinerni assigiinngitsuni sivikinnerusumik sivisunerusumilluunniit ingerlanneqarsimasuni inuit katillugit 1.071-it atuartissimallugit.