Folketingimut qinersineq
Assit takukkit: Aasianni taasiartortut procentinngorlugit suli appasissut
Aasianni taasiartortut procentinngorlugit nal. 16 31,6 procentiupput, 2011-mi Folketingimut qinersinermi taamaalinerani 42,37 procentiusimallutik
Aasianni Folketingimut qinersinermi ualinerani taasiartortut procentinngorlugit ukiut sisamat matuma siorna qinersinermit suli appasinnerupput.
Nal. 16 taasiartorsimasut taamaallaat 734-nik amerlassuseqarput, 2011-mi taamaalinerani 986-inik amerlassuseqarsimallutik.
Taama illoqarfimmi Aasianni qinersiviup aqutsisua Niels Kristensen Sermitsiaq.AG-mut paasissutissiivoq.
Aasianni nal. 10 taasiartorsimasut qanoq amerlatiginerat uani atuaruk.
Aasianni taasisinnaasut 2325-upput. Taakkua suli taasiartorsinnaapput.
Taasiartorsimasut amerlassusaat tunngavigalugu Aasianni innuttaasunik aqqusinermi apersuivugut Folketingimut qinersineq pingaartinneraat imaluunniit soqutiginnginneraat.
Hans Peter Kristiansen, utoqqalinersiutilik, oqarpoq:
- Ilumoorlunga isumaqarpunga kalaallit Folketingimut aamma taaseqataasinnaanerat pingaartuusoq, Naalagaaffeqatigiinnut ilaavugut, tamannalu taasisinnaatitaanermik aamma imaqarpoq. Folketingimut marlunnik ilaasortaatitaqarpugut, Folketingimilu sinniisuutitaqarnissarput pingaartumik ukiuni makkunani pingaaruteqarpoq. Politikerit inissani taakkunani marlunni issiasussat tassaapput uagut siutivut isivullu, Christiansborgimi pisunik malinnaasussat, namminiilivinnissamillu suliniuteqarnitsinni tamanna pingaaruteqarpoq, Hans Peter Kristiansen Sermitsiaq.AG-mut oqarpoq.
Karl-Peter Kristensen, Norgemi universitetimi ilinniartuusoq, oqarpoq:
- Isumaqarpunga Folketingimut taasinissaq pingaartuusoq, Kalaallit Nunaat Danmarkimi Folketingimi aalajangeeqataasinnaaniassammat taamalu Danmarkimi naalakkersuisut politikkiannut sunniuteqarsinnaaniassammat.
- Assersuutitut oqaatigisinnaavakka suli inatsiseqangaatsiarmat kalaallit tigusassaannik, aammami Danmark naalagaaffeqatigaarput, Karl Peter Kristensen oqarpoq.