Inuiattut ullorsiorneq
Assit takukkit: Aarhusimi inuiattut ullorsiorneq
Inuiattut ullorsiornermi Aarhusimi Kalaallit Illuutaat ilaatigut kalaaliminertortitsivoq
Aarhusimi inuiattut ullorsiorneq pisarnertut nalunaaqutaq 10.00 aallartippoq. Ukioq mannalu kalaalerpassuit Aarhusimi katersuupput. Aarhusimeersut, Ikastimeersut, Randersimeersut, Herningimeersut Ringkøbingimeersullu.
Svend Kolte-p, Aarhusimi Kalaallit Illuutaanni forstanderip, Erfalasorput amuvaa, erinarsoqatigiillu Kajak najuuttorpassuit peqatigalugit erinarsorpaat "Nuna asiilasooq". Ullaap tungaani anorlingaarmat erfalasoq tingitaangajappoq.
Svend Kolte-p, aggustimi atorfimminit tunuartussap, oqalugiarnermini inuiattut ullorsiornertarnerpassuit, Jyllandip qeqqani kalaallinik nalliusseqataaffigisarsimasani qutsatigai, illulu atuisartuilu siunissamik pitsaasumik kissaallugit. Tamatuma kingorna kalaaliminerpassuit, Royal Greenlandimit tunniunneqarsimasut, sassaalliutigineqarput.
Kapisillit pujuukkat, qalerallit pujuukkat raajarpassuillu inuppassuarnut sassaalliutigineqarput. Nerinerup kingorna bingo-rtoqalermat nerisassat nungungajassimapput. Bingo-mut pladit minutsit marluinnaat ingerlaneranni tamarmik tunineqarput.
Kingorna Kajak neqinik qillerisitsivoq naatitalerlugit pasta-lerlugillu. Ulloq naggataarlugu Nattoralik nipilersorput.