Island Games
Assit takukkit: Aamma angutit ingerlaqqinngillat
Kalaallit arsaalluni nunanut allanut unammisartut semifinalimut anngutissagunik Saaremaa ajugaaffigerujussuartariaqarpaat. Unamminermi kalaallit periarfissarpassuit maangaannartittarpaat
Sermitsiaq.AG-p marlunngormat ullaakkut allanneratut kalaallit arnat arsaannermi medalje-nassinnaajunnaarput. Island Gamesimilu matumani, Jerseymi ingerlanneqartumi, aamma angutit ingerlaqqinngitsoorput.
Kalaallit arsaalluni nunanut allanut unammisartut Saaremaa taamaallaat 2-1-mik ajugaaffigaat. Taamaasilluni gruppimi normu 2-ngorput.
Tamatumunnga pissutaavoq Menorca-p Åland 3-1-mik ajugaaffigimmagu, Menorca-lu Kalaallit Nunaannit amerlanerusunik isertitaqarsimavoq.
– Siusinnerusukkut arsaalluni unamminerup kingorna qiasimanngisaannarpunga, ippassarli (marlunngormat, aaqqiss.) unamminerup kingorna qiavunga, tassami unamminermi suut tamaasa ajunngitsumik ingerlakkaluaratsigit, nunanut allanut unammisartut sungiusaasuat Tekle Ghebrelul Sermitsiaq.AG-mut oqarpoq.
Kalaallit unammisartut Saaremaa-mut unamminermi periarfissarpassuit maangaannartittarpaat. Arsaq akeqqaminnit tigumminerujussuuvaat, Saaremaa-llu målmandia aatsaat taama unammilluartigaaq. Unamminermi minutsini kingullerni 20-ni Saaremaa quliinnarnik arsaattoqarpoq.
– Unamminermi 10-1-imik ajugaasimasinnaagaluarpugut. Naggataatigut 3-0-mut isertitsiniaraluarpugut isertissinnaasimanaguli unammineq aqukkaluarlutigu, nunanut allanut unammisartut sungiusaasuat oqaluttuarpoq.
Unammineq naajartulersoq Saaremaa saassusseriataarnermigut isertitsivoq. Kalaallini isertitsisuupput Frederik Funch aamma Ludvig Brogerg.
Kalaallit angutit arsaalluni nunanut allanut unammisartut Island Games sioqqullugu arsaannermi ilimanarnerpaat ilaattut imminnut isigisimagaluarput.
Assit ataani takukkit