Kolding
Assit: Takornartat - assinik oqaasertalerlugit saqqummersitsineq
Kinaassuseq takornartaalersitsinerlu sammillugit assiliisut marluk nunarput sammillugu saqqummersitsipput
Koldingimi eqqumiitsuliornermut centeri Nicolai Kunst & Design-imi saqqummersitsineq ingerlanneqarpoq. Assiliisut marluk Anastasia Kiake aamma Carsten M Pedersen, assilisaminnik oqaasertalerlugit saqqummersitsipput.
Saqqummersitsinermi saqqummineqarput apeqquterujussuit kinaassuseq takornartaalersitsinerlu.
Saqqummersitsineq pingasunik immikkoortulik
Anastasia Kiake-p inuit kiinaannik assilisaqattaagaani eqqaamasat puigukkallu sammineqarput, eqqumiitsuliortup assilisani aallaavigalugit oqaluttuaralugit kinaassuseq, nunagisamik annaasaqarneq, takornartaalersitsineq ataqatigiinnerlu. Anastasia Kiake Sermitsiaq.AG-mut ilaatigut oqarpoq:
– Sunik tamanik akuugaanikuuvunga. Russiuvunga Letlandimeersoq, nalunngilaralu kulturit marluk atorlugit qanoq ittuunersoq. Tamatigut annaasaqartoqartarpoq. Qujanartumik allanik nassaartoqartarpoq. Aamma kulturinut allanut ammanerulernartuuvoq paasisaqarnarnerullunilu, kulturit marluk tunuliaqutarigaanni. Anastasia Kiarkep aamma assilisani qalipattarpai. Taamaasilluni assit pissanganartorujussuit pilersittarpai.
Carsten M. Pedersen
Assiliisoq Carsten M. Pedersen immikkoortunik marlunnik saqqummersitsivoq. Her er jeg, (Uanga) tassaapput inuit 12-it assingi. David, Karline, Thala, Dorthe, Arnaute, Kristine, Peter allallu tallimat assilisissimasut imminnut oqaluttuarilaarlutik. Oqaasertaat namminerminnut tunngasorujussuupput, taamaasillunilu inuttut saqqummersitat sakkortusillugit.
Set i Grønland (Kalaallit Nunaanni takusat), Carsten M. Pedersenip 2012-imi Kalaallit Nunaanni angalanermini assilisarisimavai. Nuummit, Ilulissanit Kangerlussuarmillu assilisat. Set i Grønland-imi saqqummersinneqarput assit 12-it angisoorujussuit qalipaateqanngitsut. Saqqumemrsitat siusinnerusukkut Odensemi takutinneqarsimapput.
Carsten M. Pedersen Sermitsiaq.AG-mut oqaluttuarpoq saqqummersitani eqqarsaatigisamit amerlanerusut.
– Init immersorneqartussaasimapput taavalu inunnik 12-nik assilisanik saqqummersitassaq Her er jeg sanalerpara. Anastasia Kiake-p assilisaanik ilallugit saqqummersitat ilusinikkiartorput.
Niviaq Korneliussen
Saqqummersitsinerup ammarneqarnerani qaaqqusarpassuit qilanaarisimavaat atuakkiortup Niviaq Korneliussenip atuakkiaminit nersualaarneqartorujussuarmit ´Homo Sapienne´ atufassinissaa. Ammaasersiornermili qaaqqusat Niviaq Korneliussen tusaallugulu takuvaat taamaallaat filmikkut. Niviaq Korneliussen Nunatsinniippoq, taamaattumillu atuffassilluni fimiliaaqqamik nassiussisimalluni.
Nicolai Kunst & Design-imi Nunatsinnik samminnillu saqqummersitsineq takuniagassaalluinnarpoq, februaarillu aallaqqaataata tungaanut takuniarneqarsinnaavoq.
Assit ataani takukkit