pilluaritsi
Assit: Peqqissaasuni ataqqinaammik ilaasortanngortut
Peqqissaasut Kattuffiata inuit marluk ataqqinaammik ilaasortanngortippai
Peqqissaasut Kattuffiat ataatsimeersuarnerminut atatillugu marlunnik ataqqinaammik ilaasortanngortitsivoq. Kattuffimminni ataqqinaammik ilaasortanngortut tassaapput Aase Nygaard aamma Lili Naja Jacobsen, Nuummeersut.
– Aasep sivisuumik sulisimanermini Kalaallit Nunaanni peqqissaanerup ineriartornera sunniuteqaqataaffigisimavaa, ukiorpassuarnilu peqqinnissaqarfimmi atorfeqarnermini assigiinngissuteqartitsisimalluni - peqqissaanikkut, peqqissaasuni peqqinnissaqarfimmilu, Aase Nygaardip ataqqinaammik ilaasortanngortinneqarnerani taamatut tunngavilersuisoqarpoq.
Aamma Lili Naja Jacobsen suliniuteqarluarsimanini pissutigalugu nersorniarneqarpoq.
– Lili Naja sulinermini siumut isiginiartuusimavoq Nunatsinnilu peqqissaanerup kiisalu peqqissaasut Nunatsinni suliaasa ineriartortinnissaannik qasusuilluni tamaviaaruteqarsimalluni siuttuusimallunilu, Peqqissaasut Kattuffiat tunngavilersuummini allappoq.