Nuuk Nordisk Kulturfestival
Assit: Norskit qitittartut qitinnermik isiginnaagassiamik nuannivissumik takutitsipput
Nuummi kulturimik pikialaartitsinermi qitittartoqatigiit ´Panta Rei´ tallimanngormat isiginnaagassiaq ´I wish her well´ Nunatta Isiginnaartitsisarfiani takutippaat
Norskit qitittartoqatigiit Pan Rei-kut qitinnermik isiginnaagassiaq inuunermut kajumissinartoq ´Hvad vil det sige at være gammel - hvad vil det sige at være ung?´ takutippaat.
Tamanna pivoq tallimanngormat Nuummi Nunatta Isiginnaartitsisarfiani, nunat avannarliit kulturimik pikialaartitsineranni.
Tamanna sioqqutilaarlugu qitittartoqatigiit meeqqanik Qiajuk dansestudio-meersunik sammisaqartitsipput, tamannalu ippassaq Nunatta Isiginnaartitsisarfiani takutinneqarpoq. Ippassaq ullaakkut Kangilinnguit Atuarfianni 6.b-mi atuartut Panta Rei-mik takutitseqataapput.
Takutitsinerit arlallit
Aamma isiginnaagassiaq Alheimurinn, isumalik avataarsua, tallimanngormat takuteqqaarneqarpoq.
Qitinnermik isiginnaagassiaq kalaallimit Alexander Montgomery-Andersenimit sananeqarsimavoq, isiginnaagassiallu takutinneqarnerani norskeq qitittartoq peqataavoq. Isiginnaagassiami minutsinik 15-iinnarnik sivisussulisimmi inuit isiginnaartut killitsinneqarlutillu tiguartinneqarput.
Nina Teiturilu Katuami tusarnaartitsipput
Erinarsortartoq Nina erinnanik nutaarluinnarnik killitsinnartunillu arlalinnik atuivoq - tusarnaartut arlallit qullipitsillugit.
Nina oqaluttuaaqqanik oqaluttuarpoq erinarsukkani atulerlugit qanoq pilersimanerat oqaluttuarisarlugu, taamaasillunilu tusarnaartitsinera immikkut quianartunik qanilaarnermillu imaqarpoq. Ninap tusarnaartitsinerata kingorna savalimmiormiu Teitur erinarsorluni noqartilersukkamik tusarnersumik sivisuumik atuivoq.
Taassuma tusaamasaassummi ilaminiinnanngui atorpai, tusarnaartullu erinarsuutinik ilisimaneqannginnerusunik immikkullu ittuunerusunik atuiffigalugit. Erinartortartullu taakkua marluk tupaallatsitsillutik scenemeeqatigiipput Kim Larsen 70-iliinerani pilluaqquniarlugu. Taakkua Kim Larsenip sanaava Om lidt atorpaat.
Aliikkusersuisut assigiinngitsut
Nina Teiturimilu tusarnaartitsereersut svenskeq Bellgate Inersuaaqqami tusarnaartitsivoq. Kinguninngua scene tamanut ammarneqarpoq, tamatumanilu festivaleqataasut arlallit illoqarfimmiullu piginnaasalit scenemiipput immikkullu illuinnartumik tusarnaartunut misigisaqartitsillutik. Katuami unnuup sinnera nuannerluinnartumik ingerlavoq.
Unnuarissanut Manhattanimi eletroniskimik festivali Naqqarmiut ingerlanneqarpoq, tassanni DJ-t rappertartullu arlallit nal. 3 tungaanut aliikkusersuillutik. Ullumi arfininngornermi Nunatta Isiginnaartitsisarfiani pisoqarluaqqissaaq peqatigalugit Alheimurinn, Sælkvinden taavalu filmi Toqqortat takutinneqassalluni. Unnugu Katuami tusarnaartitsissapput Nive Nielsen aamma the Deer Children aamma Loney Dear, Sverigemeersut. Manhattanimi elektroniskimik festivali Naqqarmiut ingerlanneqaqqissaaq - taamaattumik Nuuk Nordisk Kulturfestivalimi kulturikkut pisiorpassuaqaqqinnissaani peqataagit.
Assit ataani takukkit