Qaqqasiorneq
Assit: Nickip ikinngutini peqatigalugit Sermitsiaq qaqigaa
Naalakkersuisoq Nick Nielsen, Siumut, ikinngutini peqatigalugit Nuup eqqaaniittoq qaqqaq Sermitsiaq akunnerup naanerani qaqivaat
Qaqqasiortartoq aamma ilinniartitaanermut, ilageeqarnermut, naligiissitaanermut kulutureqarnermullu naalakkersuisoq Nick Nielsen Siumumeersup Nuup qaqqani ilisarnaataa Sermitsiaq akunnerup naanerani qaqivaa.
Politikkerip ikinngutini arfinillit peqatigalugit qaqqaq qaqivaa.
- Arfineq marluulluta qaqivarput. Umiatsiamik angalanerput ilanngullugu qaqqaq arfininngormat qaqigatsigu akunnerit aqqanillit atorpagut, Nick Nielsen Sermitsiaq.AG-imut oqaluttuarpoq.
Qaqqamik qaqinnittuupput: Najannguaq D. Lennert, Claus Risbjerg, Jan Berg Jensen, Tuperna Davidsen, Lise Buchardt, Allan Sandgreen aamma Nick Nielsen.
Qaqqasiornermik misilittagaqarluartup - aamma Mount Everestip qaavaniinnikup - oqaluttuaraa Sermitsiap qaqinissaa ajornanngitsuinnaanngitsoq. Sermitsiap qaava qaqiniarlugu tunuatigut qaqivaat.
- Qaqqap qaqiniarnissaa tamatta sukataarutigaarput, Nick Nielsen oqaluttuarpoq.
- Aqqutigisarput sarpernartuuvoq. Naak ilavut ilaat portusuumiinnertik qunugigaluaraat unammillernartut tamarmik anigorpavut. Qaqeqataasut amerlanerpaartaat Sermitsiaq aatsaat qaqivaat. Najannguaq D. Lennertip qaqqaq pingajussaa qaqivaa, 2003-mi siullermeerluni qaqigamiuk, Nick Nielsen oqarpoq.
Nick Nielsenip Najannguaq D. Lennert peqatigalugu Himmalayamiipput tassani Parkistanimiillutik. Himmalayamiinnerminni K-2-miipput, tassani basecamp tikillugu pisullutik.