Assit: Nersornaasiineq killitsinnartoq

Namminersorlutik oqartussat avatangiisinut pinngortitamullu nersornaataannik ukiormanna tunineqartoq suliumminik ’Saligaatsoq’mik nangitsinissaminut piareersimavoq. Taanna aallarneeqatinilu Betina Kristiansen sapaatip akunneranut ataasiarluni illoqarfimmi saliisarnissamut nunaqqatiminnik kajumilersitsisimapput.

Avatangiisinut pinngortitamullu nersornaammik tigusisut aqqi tallimanngornermi saqqummiunneqarpoq nersornaallu sapaammi ullaap tungaa Nuummi Hans Egedep illuani tunniunneqarpoq. Avatangiisinut naalakkersuisoq Kim Kielsen Siumumeersoq nersornaammik Mia Lindenhannimut tunniussivoq.

- Aliasuutigalugulu nuannaarutigaara eqqarsaatigalugu Betina Kristiansen maaneeqatigisussaasimagaluarakku. Taanna ’Saligaatsoq’mi assut suliniarsimavoq. Imassarsiorfissaavoq saqqumilaarluni aammalu isummanik anissillaqqinnermigut piumasaqallaqqissuulluni, Mia Lindenhann qujassuteqarluni oqaaseqarnermini oqarpoq.

Suliniut ’Saligaatsoq’ iluatsilluartumik Ilulissani ingerlaluartoq saligaannersumik avatangiiseqalernissamik anguniagaq suli ungasissinnaavoq.

- Eqqakkat Nunatsinni nunarsuarmilu annertuumik ajornartorsiutaapput. Takullugimmi kusanaaginnanngillat aammali pinngortitamik uumasunillu innarliisinnaallutik. Pinngortitap piinik nerinissaq nuannarisaraarput. Eqqagarpassuit ukiut huntritillit pinngortitamiittussapput nerisatsinnut akuliussinnaallutik. Eqqarsarluarit eqqaavillu atorlugu, Mia Lindenhann oqarpoq.

Saligaatsoq upernaamut Ilulissani ingerlateqqinneqassaaq Mia Lindenhannillu anguniarpaa Saligaatsup Nuummi aallartinnissaa.

Nersornaatip tunniunnerani erinarsoqatigiit Nipe erinarsorput Hans Egedep illuani pingaartorsiualaarnikkut nersornaasiisoqarmat.