Børne Cup 2015
Assit: Meeqqat arsartartut Sisimiuneersut pissartanngortut
Assammik arsarnermi Pisiffik Børne Cup 2015 Sisimiuni ingerlanneqartumi ataasinngormat pissartanngorniupput. Tassani sisimiormiuaqqa ajugaapput
Assammik arsarnermi siunissami tusaamasanngorumaartut aqqanillit ataallugit ukiullit Sisimiuni pissartanngorniupput arfininngornermit ataasinngornermut ingerlanneqartumik.
Nukappiaqqani timersoqatigiiffiit sisamat peqataapput. Taakkulu tassaapput aaqqissuisut Sisimiunit S-68 aamma SAK, GSS Nuummit aamma Nagtoralik Paamiunit.
Unamminerit siulliit ingerlanneqareerneranni paasinarsivoq S-68 aamma Nagtoralik pissartanngorniutissasut. Pissartanngorniunnermi S-68 ajugaavoq 12-8-mik.
Pissartanngorniunneq sioqqullugu GSS bronzennappoq, SAK-mut 21-15-mik ajugaavoq.
Niviarsiaqqat Sisimiormiut ajugaasut
Aamma niviarsiaqqat ajugaaniupput. Tassani timersoqatigiiffiit tallimat peqataapput, tassaasut GSS aamma Nûk Nuummit, Kâgssassuk aamma Aqissiaq Maniitsumit kiisalu Sisimiunit SAK.
Pissartanngorniunnermi SAK ajugaapput, NÛK-mut 25-17-mik ajugaallutik. Aqissiaq bronzennapput GSS-mut 19-13-mik ajugaallutik.
Kâgssassuk Børne Cup 2015-mik tallimaattut inissipput.
Assit ataani takukkit