paasititsiniaaneq
Assit: Maniitsumi Qujanaq pillugu tusarnaartitsineq
Pinngortitami najugaqarfinnilu eqqiluisaarnissaq anguniarlugu tusarnaagassiortoqarpoq
Tusarnaartitsineq paasititsiniaanerup taaneqartup Qujanaq ilagaa, tassanilu kikkut tamarmik eqqaavinnik atuinissamut, taamaalillunilu Kalaallit Nunaanni pinngortitamik paarseqataanissamut kajumissaarneqarput. Erinarsortartoq Julie Berthelsen suleqatigalugu ingerlanneqarluni.
Maniitsumi Atuarfik Kilaaseeqqami meeqqat 45-it erinarsoqatigiit sapaatit akunnerisa arlallit ingerlanerini erinarsuut Qujanaq, nipilersornermut ilinniartitsisortik Arnannguaq Rosing Olsen peqatigalugu sungiusarsimavaat. Pingasunngormat ullaap tungaani Julie Berthelsen, guitarertartoq Malik Olsen aammalu erinniortoq Per Rosing atuarfimmut tikipput, meerarpassuit ilagalugit erinarsuut naammassillugu sungiusarniarlugu.
Maniitsup oqaluffiata saani tusarnaartitsipput, tusarnaariartunit 250-init orninneqarlutik. Naalakkersuisoq Kim Kielsen paasititsiniaaneq Qujanaq pillugu oqaluttuarpoq.
- Tamatta immikkut annikitsunnguamik suliniuteqarnissarput pingaaruteqarpoq. Taamaattumik eqqaaviup atornissaanut paasititsiniaaneq una suliaraarput. Taamaalilluta Kalaallit Nunaanni pinngortitamik paarseqataaniassagatta, Kim Kielsen oqarpoq.
Nuummiut aamma erinarsussapput
Tusarnaartut paasititsiniaanerup Facebook-ikkut nittartagaa 'Qujanaq' malinnaaffigeqqullugu kajumissaarivoq. Tassaniipput paasititsiniaanermit assilisat nutaarsiassallu, aammalu erinarsuut Qujanaq atorlugu unammititsisoqassaaq.
Tusarnaartitsinermi Julie aamma Malik Juliep erinarsugaani nuannernerpaat marlussuit atorlugit aallarniipput.
Tamatuma kingorna meeqqat erinarsoqatigiit Juliellu erinarsuut Qujanaq pingasoriarlutik atorpaat. Erinarsuutip atoqattaarnertaanut ilannguttartut amerliartorput.
Tusarnaartitsineq naggaserlugu meeqqat aamma Julie Berthelsen pattaaterujussuarneqarput.
Nuummi Nuussuup atuarfiani atuartut ullumi tallimanngornermi 'Qujanaq' immiutissavaat.
Assit ataani takukkit