Assit: Kulturikkut pikialaartitsinermi arferit qarmamilu titartakkat

Savalimmiormiu erinarsortartoq Teirtur ippassaq marloriarluni tusarnaartitsivoq. Ualikkut svenskeq Loney Dear ilagalu Inuk Hostelsimi tusarnaartitsivoq silagissuup ataani.

Tusarnaariat immikkorluinnaq misigisaqarput imaq, Sermitsiaq ilulissallu tunuliaqutaralugit. Loney Dear siullermik nipinik allaalluinnartunik saqqummiussivoq, erinarsorami elektroniskimik nipilimmik, erinaalu nalissaqanngivissuulluni.

Tulliulluni Teitur torraallaalluinnarpoq, tusarnaartitsinerullu nalaani immikkut marlussunnik isiginnaartoqarpoq, tassa tusanaartitsinerata nalaani arferit marlussuit avataani takkummata. Tusarnaartitsineq ima qanitsigisumik pivoq, tusarnaartut nipilersukkat qanttuararsuullugit malugisinnaallugit.

Unnukkut Katuami Loney Dear tusarnaartitseqqippoq, taannalu pereermat Nive Nielsen aamma the Deer Children erinnanik nutaanik arlalinnik atuillutik tusarnaartitsipput, atugaalu nuummit novembarimi saqqummersitassaaneersuupput. Tusarnaartitsinerata nalaani Teitur tuapaallatsitsilluni scenemut qaqivoq Nivelu nipilersortartuilu Deer Children 3-4-nik atuilluni nipilersoqatigalugit.

Sælkvinden meeqqanik inersimasunillu tiguaavoq

Qallunaap oqaluttuanik oqaluttuartartup Anette Jhanip Savalimmiunit Islandimillu oqaluttuatoqaq Sælkvinden oqaluttuaraa, kalaallillu arnamik saanikuinnarmik oqaluttuatoqaat oqaluttuaralugu. Nunatta Isiginnaartitsisarfiata paarlersua inunnik ulikkaavippoq, meeqqat inersimasullu tiguartissimaqalutik oqaluttuartoq tusarnaarlugu. Anette Jahn ullumi Meeqqanut Atuagaatqarfimmi oqaluttuaqqissaaq, tamatumuuna nal. 14.00 oqaluttuaq ´Askepots hvide due´ meeqqanut oqaluttuarissallugu.

Nuuk Nordisk Kulturfestivalip ingerlanneqarnerani illoqarfimmi sumi tamaani atuagassiaq LARM naapinneqarsinnaavoq, tassumalu festivali nutaamik taalliorpalaartumillu oqaluttuaraa. Ilaatigut naapitaaaa Katuamilu tusarnaariat skrivemaskiinatoqqamut allassinnaapput atuagassiamullu eqqumiitsuliaaqqanik sanasinnaallutik.

– Nuummiunit festivalimilu peqataasunit tikilluaqquneqarluarsimaqaagut. Oqaluttuanik nuannersorpassuarnik, taallianik titartakkanillu pissarsivugut, atuagassiap pilersitsisuata aappaa Kenneth Schønning Olsson oqarpoq. Taassuma Jakob Fälling peqatigalugu sapaatip akunnera naallugu Nuummi pisunik, titartakkanik oqaluttuanillu katersisimavoq. Atuagassiaq akeqanngilaq novembarimilu Katuamut aaneqarsinnaassaaq.

ASK-ip qarmaani titartakkat

Arfininngorneq ulloq sammisaqartitsivissuuvoq. Atuarfik Samuel Kleinschmidtimi (ASK) inuusuttut soqutiginnittut tamarmik atuarfiup qarmaani titartaanermi peqataasinnaapput. Islandimiut qarmani titartaasartut ilisimaneqartut Adrian Freyr Rodriguezip aamma Stefán Óli Baldurssonip titartaaneq siulersorpaat, inuusuttullu suleqatigalugit marraq kusanartumik titartaaffigaat.

Nuup Qeqqani meeqqat Nuummiut 12-it, nunanit avannarlernit assigiinngitsunit siulillit, naapeqatigiipput, taakkualu Nuuk Nordisk Kulturfestivalip ingerlanneqarnerani kinaassutsiminnik takutitsisarput kiinarpaliorlutik qalipaallutillu. Suliniut taaneqarsimavoq ´Rundt om Norden´, taassuminngalu aqutsisuuvoq Susanne Jensen. Soqutiginnittut tamarmik meeqqat sanaavi Nuup Qeqqani nal. 13-17 takuniarsinnaavaat. NUIF-imi ualeq naallugu inuusuttunik elektroniskimik sammisaqartitsisoqarpoq DJ-t rappertartullu nunanit avannarlerneersut peqatigalugit.

Elektroniskimik tusarnaartitsinersuaq

Unnuaq naggaseqqinneqarpoq Naqqarmiuni elektroniskimik festivalimik, tassanilu DJ-t peqataasut tassaapput: Uyarakq, Da Bartali Crew, Maati aamma Kiili. Unnuk eqqissisimasumik aallartikkaluartoq aaqqissuussineq nuannerluinnartumik naggaserneqarpoq.

Elektroniskimik nipilersornermi nipilersoriaatsit assigiinngitsorpassuit saqqummiunneqarput - nalissaqanngitsumillu qullernik seqertitsinerit atorneqarmata tusarnaartit qittallutillu nipilersukkanik nuannisartinneqarput. Tupinnaqaaq takullugit Kiili Maatilu DJ-imik qanoq sungiussisimarpasitsigisut, aatsaat Upernavimmit tikeqqammerlutik siullermeersumillu Nuummi tusarnaartitsisut. Neriunarpoq siunissami tusarnerusalissagivut.

Assit ataani takukkit