sapiitsuiliortut
Assit: Kalaallit sapiitsuliortut nersornaatiseqqipput
Assit: Kalaallit sapiitsuliortut nersornaatiseqqipputPoliteeq Brian Thomsen aamma Nathan Kreutzmann Nuummeersut sapiitsuliorsimasutut Redningsmedailleselskabetimi ilaasortanngorput
Diplom angisooq aamma pokali politimut Brian Thomsenimut aamma Nathan Kreutzmannimut Nuummeersumut tunniunneqarput. Taakku marluullutik siornatigut rigspolitichefimit aamma Carnegiep sapiitsuliorsimasunut aningaasaateqarfianit nersornaaserneqarnikuupput inoqatimik inuuneranik annaassisimasutut. Maannalu tassa Redningsmedailleselskabetimi ilaasortaalerput tassanilu ukiumut ilaasortanngortartut ikittuararsuupput.
Nathan Kreutzmannip februar 2012-mi Nuutoqqami angut imaaniittoq takuaa. Nangaarianngivilluni imaanut pissippoq inuuneralu annaallugu.
Brian Thomsen aamma angutip inuuneranik annaassivoq 2013-mi junip 21-ata ullaassaani angut umiarsualiviup kilisaasuullu akornannut isimmat. Brian Thomsenip nissuni imaaniitillugit angut paarisimavaa kilisaassuarmit talittarfiup tungaanut kiggigutsiinnariaalluni, taamaasioreersoq annaassiniartartut allat takkupput angullu isittoq qaqillugu.
Ikittuinnaat ilaasortaapput
- Nathan Kreutzmannip aamma Brian Thomsenip Redningsmedailleselskabetimi ilaasortanngornissaat Carnegiep aningaasaateqarfianit inassutaasimavoq, politimester Bjørn Bay diplomimik Engbølillu pokalianik tunniussinermini oqarpoq, pokalinilu sapiitsuliortut atii allaqqapput
Inuit ikittuinnaat Redningsmedailleselskabetimi ilaasortanngortarput.
Tunniussinermi Bjørn Bay oqaluttuarpoq 2012-i pingasuinnaat naalagaaffeqatigiinnermi ilaasortanngorsimasut sisamat 2013 sisamallu 2014-mi.
- Aatsaat ilaasortanngortoqarsinnavoq immikkut illuinnartumik nammineq inuuneq ulorianartorsiortillugu inuup inuuneranik annaassinermi, Bjørn Bay oqaluttuarpoq.
Politini suleqataasut sapiitsuliortullu ilaqutaat tunniussineq najuuffigaat politimestereqarfimmi pimmat.