misigisassarsiorneq
Assit: Kalaallit Nunaata imartaa nunataalu Google Street View aqqutigalugu ilisimasassarsiorfigikkit
Illoqarfiit, nunaqarfiit sumiiffiillu ilaat qarasaasiaq aqqutigalugu ilisimasassarsiorfigineqarsinnaalerput
Qarasaasiaq aqqutigalugu illoqarfiit, nunaqarfiit sumiiffiillu aalajangersimasut misigisassarsiorfigineqarsinnaalerput.
Tamakku tamarmik pisinnaapput Google atortorissaarutaallu ilisimaneqarluartoq Google Street View – illoqarfinnik sumiiffinnillu assiliisaqattaariaaseq – aqqutigalugit, taakkuami ’trekker’-imik nassataqarlutik siorna Kalaallit Nunaanniissimapput.
Trekkeri tassaavoq assiliivik angallattagaq 15-inik assiliivittalik sammivinnillu tamanik assiliisinnaasoq.
Assilisat pilersinneqarsinnaanngorsimapput Asiap Visit Greenlandimik ataqatigiissaakkamik suleqateqarneratigut, aasap ingerlanerani illoqarfinnit nunaqarfinnillu tikeraakkanit kilometererpassuarni ingerlaarnermi assilisarpassuarnik katersisoqarsimammat, Googlellu assilisat qarasaasiakkut Google Street Viewimi ullumikkumiit tamanut isiginnaarneqarsinnaanngortippai, tamanna tusagassiuutinut nalunaarummi atuarneqarsinnaavoq.
Tamanut iluaqutaasoq
Google Street View ukiualuit ingerlaneranni internettimi kiffartuussiviit nuannarineqarnerpaartaannut ilaavoq. Taannalu periarfissaq Visit Greenlandimi pisortamit Anders Stenbakkenimit iluarisimaarneqarluarpoq.
- Suleqatigiinneq internettimik atuisunut, Kalaallit Nunaannut Googlemullu ataatsimut iluatsilluarsimavoq. Visit Greenlandip takornariat amerlanerit Kalaallit Nunaannik soqutiginnilersittussaavai, Googlelu internettimik atuisut amerlanerpaartaannut ujaasiffissatut ullumikkut pingaarnerpaammat, internettimi nunarput pillugu paasissutissanik atorsinnaasunik amerlanerpaanik nassaassaqarnissaa soorunami soqutigisariinnarparput, Stenbakken tusagassiuutinut nalunaarummi oqarpoq.
Google Maps nunarsuarmi eqqornerpaamik, atorluarneqarsinnaanerpaamik imaqarnerpaamillu nunap assinganik sananissani siunniuppaa, Street View-imillu ilallugu inunnut assitut takusassiaralugu paasissassarsiorfittut ingerlaarneq iluarusuutissatut sananaaneqarnera qitiulluinnarpoq.
Kalaallit Nunaat nunarsuarmiunit isigalugu pinngortitaq silallu pissusaata pingaaruteqarnera tunngavigalugu immikkut soqutiginaateqarpoq, taamaattumillu Google Kalaallit Nunaat pillugu paasissutissanik amerlanernik pissarsinissamut soqutigisaqarluarsimalluni, suliffeqarfinnit Namminersorlutik Oqartussanit pigineqartunit marluusunit naggasiutigalugu oqaatigineqarpoq.
Kalaallit Nunaanni sumiiffiit paasisassarsiorfigineqarsinnaasut tassaapput:
Tasiilaq, Qaqortoq ,Narsaq, Narsarsuaq, Qassiarsuk, Tasiusaq (kujataaniittoq), Paamiut, Nuuk, Kapisillit, Ilulissat aamma Uummannaq.
Assit grafikkillu ataani takukkit