Arctic Winter Games
Assit: Kalaallit Alaska ajorsartippaat
Arctic Winter Gamesimi unammissummi kingullermi Dene Games-imi nukittussuseq oqimaassuserlu aalajangiisuupput
Indianerit timersuutaannik Dene Games-imik kalaallit timersuummik taassuminnga aallussisut Arctic Winter Gamesimi 12-nik medalje-napput. Medalje-t kingulliit pissarsiarineqarput unammissummi pole push-imi, tassani akerariit orpiup timitaanik ajattaallutik. Kalaallit angutit inersimasut inuusuttullu kuultinnapput, nivissallu sølvinnallutik.
Pole push-imi angutini inersimasuni kalaallit Alaska finalimi unammivaat. Akerariit orpiup timitaa tigulluarterpaat akeqqatillu bane-mit anisinniarlugit ajattarlugit. Alaska ajorsartinneqarpoq, tamannalu kalaallit isiginnaartut huraartuutigaat.
Dene Games-mi kalaallit sungiusaasua Fairbanksimi Arctic Winter Games-imit angerlarpoq naammagisimaarinnilluarluni. Medalje-t katillugit 12-it pissarsiarineqarput.
– Arctic Winter Gamesip ingerlanera tamaat ataqatigiilluarsimaqaagut. Tamanna pissutaaqataaavoq taama angusarissaartiginitsinnut. Soorunami ilaat ullululaartarput. Tamarmilli imminnut kaammattoqatigiittarput qiimmaqqipallattarlutillu, arlaat ullululaarsimagaangat, sungiusaasoq Alfred Lindenhann Sermitsiaq.AG-mut oqarpoq.
Dene Games timersuutaavoq nukittuujuneq pingaarutilerujussuaq.
– Peqataasuvut piareersarluarsimapput sungiusarnermilu ileqqorilluarsimallutik. Angusavut naammagisimaartorujussuuvakka, Alfred Lindenhann oqarpoq.
Kalaallit Arctic Winter Gamesimi peqataasut arfininngorpat unnukkut naggataarnersiornerup kinguninngua angerlamut aallassapput Kangerlussuarmullu tikissallutik sapaammi ualikkut.