Assit: Inuussutissarsiorneq pillugu ataatsimeersuarneq aallartippoq

Sermitsiaq.AG-mi allaaserineqareerpoq inuussutissarsiorneq pillugu Christiansborgimi ataatsimeersuartoqarnissaa, taannalu ullumi tallimanngornermi aallartinneqarpoq.

Folketing-imi ilaasortaq, Inuit Ataqatigiit, Sara Olsvig, aamma Kalaallit Nunaani Sulisitsisut Peqatigiiffiani pisortaq Brian Buus Pedersen, kiisalu Danmark-imi ilinniartut kattuffiat Avalak tataatsimeersuarnermut aaqqissuisuupput.

- Pingaaruteqarpoq Avalak peqataalluni, tamatumani inuussutissarsiornikkut ineriartortitsinerit pillugit oqalliseqataanissaa, ilinniartummi inuussutissarsiornikkut ingerlatsinernut iserteriartortussaavugut. Siunissami inuussutissarsiornikkut ingerlatsiviit pilersinneqarnissaat peqataaffigissavarput, pingaaruteqarporlu attaveqaqatigiinnerit pilersinneqarnissaat kalaallit suliffeqarfiinut suliffeqarfinnullu Kalaallit Nunaanik suleqatiginniffeqartunut, tamatuma sapinngisamik amerlalluta uterluta angerlarnissatsinnik qulakkeerinnissinnaammat, Avalak-mi siulittaasoq Hans Peder Kirkegaard oqarpoq.

Inuussutissarsiorneq pingaaruteqartoq
Kalaallit Nunaani Sulisitsisut Peqatigiiffiani pisortaq Brian Buus Pedersen qaaqquseqataasut ilaat isumasioqatigiinnissaq pillugu oqaaseqarpoq.

- Kalaallit Nunaani inuussutissarsiornikkut ingerlatsiviusut inerisarneqassappata ilisimavarput nunat tamalaat akornani suleqatigiinnerit aammalu nunat tamalaat akornani aningaasaliinerit pisariaqartinneqartut. Qilanaarivara Naalagaaffeqatigiinnermit tamanit aggersut taama assigiinngisitaartigisut arlariit takkutissammata oqalliseqataallutillu, tamatumani saniligut Islandimeersut Savalimmiuneersullu aammalu soorunami kalaallit ilinniartut oqalliseqatiginissaat qilanaaralugu. Christiansborgimi isumasioqatigiinnissamut qilanaarpunga, neriuutigalugulu danskit folketingimi ilaasortaasut oqallinnermi eqeersimaartumik peqataajumaartut.

Isumasioqatigiinnermi saqqummiisussat Kalaallit Nunaaneersut ilaatigut Inuussutissarsiornermik Aatsitassallu pillugit Naalakkersuisuusoq Jens-Erik Kirkegaard saqqummiissaaq, soorluttaaq aamma Jess G. Berthelsen SIK-meersoq, Andreas Uldum Demokraatit, Doris Jakobsen Siumut aammalu kalaallit Danmarkimi ilinniartut peqataassallutik. Danmarkimit nunanit avannarlernilu peqataasussat saniatigut Folketingimi ilaasortat arlariit kiisalu inuussutissarsiornermik ingerlatsiviit atorfilittallu danskit, savalimmiormiut aammalu islandimeersut peqataassapputtaaq.

Tusagassiortoq aammalu atuakkiortoq Martin Breum isumasioqatigiinnermi oqallinnerni aqutsisuuvoq annerusumillu oqallisigineqassallutik Kalaallit Nunaani inuussutissarsiornikkut inerisaanissani aammalu periarfissani suleqatigiinnissani unammilligassat periarfissallu.

Ataatsimeersuarnermi pilersaarut talerpiata tungaani takuneqarsinnaavoq

Assit ataani takukkit